JITS ortalyǵynyń mamandary qalyń jurtshylyq arasyna shyqty
ASTANA. QazAqparat - Búgin Astanadaǵy «Hanshatyr» saýda, oıyn-saýyq ortalyǵynda Júre paıda bolǵan ımmýndyq tapshylyq sındromy (JITS) indetiniń aldyn alý jáne oǵan qarsy kúres boıynsha qala turǵyndaryna arnalǵan aýqymdy aktsııa ótti, dep habarlaıdy QazAqparat.
«Adamnyń ımmýndyq tapshylyq vırýsyn (AITV) boldyrmaýdy qoldaımyn» atty is-shara Dúnıejúzilik JITS-ke qarsy kúres kúni sheńberinde uıymdastyryldy.
Elordalyq «JITS ortalyǵynyń» mamandary qala turǵyndaryna medıtsınalyq keńester berip, aqparattyq paraqshalar taratty. 1800-ge jýyq adam qabyldaýda bolsa, 120-ǵa jýyǵy óz erikterimen AITV-ǵa jedel testileýden ótti.
Sondaı-aq Dúnıejúzilik JITS kúnine oraı «AITV-nyń aldyn alýdy qoldaımyn» heshtegimen bir aı kóleminde túrli áleýmettik jelilerde túsindirme jumystary júrgizildi. «Turǵyndardy derttiń aldyn alýǵa qarsy aqparattyq saýattandyrý jumystary aılyq kezinde ǵana emes, jyl boıy júrgiziledi», - deıdi uıymdastyrýshylar.
Astana qalalyq «JITS ortalyǵy» bas dárigeriniń orynbasary Saltanat Mýsınanyń aıtýynsha, osal (esirtkini ınektsııalyq jolmen tutynatyndar men aqyly jynystyq qarym-qatynas usynatyn tulǵalar) jáne deni saý toptarǵa jatatyn tulǵalar arasynda indettiń aldyn alý sharalary birneshe baǵyt boıynsha ári bólek-bólek júrgiziledi. «Bul keshendi jumys. Ár nátıje biz úshin jetistik», - deıdi ol.
Aıta keteıik, Astana qalasynda ústimizdegi jylǵy 10 aıda AITV ınfektsııasynyń jańadan 161 jaǵdaıy tirkeldi. Onyń 71 paıyz jaǵdaıynda juqpa jynystyq jolmen berilgen, olardyń 49 paıyzy 20-39 jas arasyndaǵy azamattar. Infektsııaǵa shaldyqqandardyń jartysynan kóbi qaýipti top ókilderine jatpaıdy.
Dúnıejúzilik densaýlyq saqtaý uıymynyń málimetterine sáıkes, kún saıyn álemde AITV-ny jańadan juqtyrýdyń 7400 faktisi tirkeledi. Al 5500 adam AITV saldarynan týyndaǵan syrqattardan kóz jumady. Saǵat saıyn atalmysh indetke 308 adam shaldyǵady.
Medıtsınalyq jetistikterdiń arqasynda búginde JITS-ten adam ólmeıdi.
Ol úshin: em-dom qabyldaýdy ýaqtyly bastaý, dári-dármekterdi qatań túrde qabyldaý, em barysynda qatelikke boı aldyrmaý, dárigerdiń baqylaýynda bolý jáne analızderdi der kezinde tapsyryp turý qajet.
