Jitiqaranyń qutqarýshylary balyqshyny aman alyp qaldy
TJM málimetinshe, oqıǵa kýágerleri Shortandy ózeniniń sol jaǵalaýynan joǵary qaraı bógettiń janynda qamys arasynda qaıyq terbelip turǵanyn jetkizgen. Qaıyqtyń ishinde es-tússiz jatqan bir adam bar eken.
«Jitiqara qalasynyń jedel-qutqarý bólimshesiniń qyzmetkerleri oqıǵa ornyna bardy.
Olar jaǵadan 100 metr qashyqtyqta ósken qamys arasynda eki oryndyq rezeńke qaıyqty tapty. Qutqarýshylar qalyń ósken ósimdikterdi aınalyp ótip, qaıyqqa jaǵanyń basqa jaǵynan júzip bardy. Olardyń biri terbelip turǵan qaıyqqa kóterildi, ekinshisi sýda qalyp, ony ustap turdy.
Qaıyqqa kóterilgen qutqarýshy er adamnyń esin jınaýy úshin áreket jasady. Er adam balyq aýlaý kezinde ózin nashar sezinip, jaǵalaýǵa ózdiginen jete almaǵan. Onyń ústinde qutqarý keýdeshesi bolǵan joq, al qaıyqta sýdy sorýǵa arnalǵan ydys (shelek nemese shómish) te joq eken», - dep jazdy vedomstvodan.
Qutqarý operatsııasy saǵat 11:00-de sátti aıaqtalyp, qutqarýshylar 1991 jyly týǵan azamatty jaǵaǵa shyǵardy. Osy ýaqytqa deıin olardy Jitiqara qalasynyń shuǵyl den qoıý qyzmetteri jaǵada kútip turdy. Qutqarýshylar oqıǵa ornyna aldyn ala shaqyrylǵan bolatyn.
Qutqarylǵan adam jedel-járdem brıgadasyna tapsyryldy.
Buǵan deıin, 4 maýsym kúni keshke Jitiqara aýdanyndaǵy Shortandy ózeninde jedel qutqarý jasaǵynyń qyzmetkerleri 1981 jyly týǵan azamatty mas kúıinde qutqarǵan. Ol Jitiqara qalasyna jaqyn ornalasqan tómengi bóget aımaǵynda shomylǵan, biraq óz kúshin baǵalaı almaı sýǵa bata bastaıdy. Oqıǵa ornyna ýaqtyly kelgen qutqarýshylar sýǵa batyp bara jatqan adamdy qutqaryp, jaǵaǵa alyp shyqty.
