Jitiqarada úısiz qańǵybastardy óltirgen jasóspirimder sottaldy

JІTІQARA. QazAqparat - Qostanaı oblysy mamandandyrylǵan aýdanaralyq qylmystyq sotynyń úkimimen asa aýyr qylmys jasaǵan Jitiqara qalasynyń úsh turǵyny sottaldy. Onyń biri ómir boıyna bas bostandyǵynan aıyryldy, dep habarlaıdy QazAqparat oblystyq sottyń baspasóz qyzmetine silteme jasap.

2019 jyldyń jazynda sottalýshy Ch. Reseıden Jitiqaraǵa kelip, buzaqylyq, tonaý jáne jymqyrý sekildi qylmystardy jasaýmen aınalysqan. Ol óziniń qylmystyq áreketine 14 jasar eki bozbalany tartqan. Onyń bireýi - Ch-nyń týysy.

Olardyń dostyǵy asa aýyr qylmyspen aıaqtaldy. Úsheýi eki adamdy óltirip, aldyn ala oılastyrmaı taǵy bir adamdy ańdaýsyzda óltirip qoıǵan.

Birinshi jaǵdaıda Ch. ózi ǵana óltirse, ekinshi qylmys kezinde ol bárin uıymdastyryp otyrdy. ıAǵnı L. atty jasóspirimdi mas qylyp, qolyna pyshaq bergen de, aldynda uryp-soǵyp esinen tandyrǵan adamdy óltir dep tapsyrǵan.

Marqumdardyń bári - turǵylyqty úı-jaıy joq qańǵybastar bolatyn.

Aıta ketý kerek, Ch. Reseı Federatsııasynda birneshe ret sottalǵan. Ol adamdy aýyr jaraqattap, ólimge jetkizý, jasóspirimderdi qylmysqa tartý sekildi aıyppen túrmede otyryp shyqqan.

Sottalýshylardyń kinási ózderiniń sózimen, jábirlenýshiler jáne kýágerlerdiń bergen túsiniktemesimen, saraptama qorytyndysymen tolyq dáleldendi. Degenmen, Ch. óz kinásin moıyndaǵan joq.

Sot Ch-ny ómir boıyna bas bostandyǵynan aıyrdy.

Al jasóspirim L. kinásin tolyq moıyndap, istegen isine ókinetinin jetkizdi, qylmysty ashýǵa kómektesti, kisi óltirýge 14 jasynda, úlken adamnyń májbúrleýimen barǵanyn aıtty. Sot osynyń bárin eskere otyryp, ony 7 jylǵa sottady.

Al K. atty ekinshi bozbalaǵa 3 jylǵa bas bostandyǵyn shekteý jazasy berildi.

Úkim zańdy kúshine engen joq.