Almatyda sheteldik jigit qyzdy soqqyǵa jyqty
Almatyda 19 jastaǵy sheteldik jigit qyzdy qorlap, soqqyǵa jyqqan, dep habarlaıdy QazAqparat tilshisi.
Beıtanys jigitten taıaq jegen boıjetken áleýmettik jelide vıdeoúndeý jarııalady.
Almaty turǵynynyń aıtýynsha, oqıǵa 26 qyrkúıekten 27 qyrkúıekke qaraǵan túni qaladaǵy bılıard klýbtarynyń birinde bolǵan.
«Men jumysta boldym. Beıtanys er adam meni jynystyq qatynasqa shaqyryp, renjite bastady. Men bas tartqannan keıin ol meni balaǵattap, qolymnan ustady. Ol meniń jumystan shyqqanymdy kútken. Taksıge otyrǵyzbaı, ózimen birge barýǵa májbúrledi. Kelisim bermegenim úshin soqqyǵa jyqty. Men eseńgiregen kúıde polıtsııa shaqyrdym. Polıtsııa bolmasa tipti qıyn bolar edi. Men ómirim úshin qorqamyn. Onyń 19 jasta jáne shetel azamaty ekenin bildim», – dedi ol.
Almaty qalalyq Polıtsııa departamenti, atalǵan derek Túrksib aýdandyq polıtsııa basqarmasynda tirkelip, QR QK-niń 293-baby 1-bóligi boıynsha tergelip jatqanyn habarlady.
«Osy qylmysty jasaǵan kúdikti 2004 jyly týǵan A. esimdi azamat ustaldy. Boıjetkenniń alǵan jaraqatynyń aýyrlyǵyn anyqtaý maqsatynda sot-medıtsınalyq saraptama taǵaıyndaldy. Tergeý sharalary kesheniniń nátıjeleri boıynsha protsessýaldyq sheshim qabyldanatyn bolady»,- dep atap ótti Almaty qalalyq PD Baspasóz qyzmetinen.
