Jynys aýystyrýǵa qarsy zań: AQSh soty sheshim qabyldady

ASTANA. KAZINFORM — AQSh Joǵarǵy soty Tennessı shtatynda qabyldanǵan, kámeletke tolmaǵandarǵa jynysyn aýystyrý protsesinde medıtsınalyq kómek kórsetýdi shekteıtin zańdy qoldady. Toǵyz sýdıanyń altaýy bul zańdy kemsitýshilikke jatpaıdy ári AQSh Konstıtýtsııasyn buzbaıdy dep tanydy. Bul týraly Euronews jazdy.

Atalǵan zań dárigerlerge jynystyq jetilýdi toqtatatyn dári-dármekter jazýǵa, gormonaldy terapııa usynýǵa nemese psıhologııalyq aýytqýlardy emdeý úshin hırýrgııalyq operatsııalar jasaýǵa tyıym salady.

Munda jynystyq sáıkessizdikten (genderlik dısforııa) zardap shegetin adamdar týraly aıtylyp otyr — bul adam óziniń jynystyq sáıkestigi men týǵan kezdegi bıologııalyq jynysy arasynda úılespeýshilik sezinetin jaǵdaı.

Zańda týa bitken aqaýlardy, fızıkalyq jaraqattardy nemese jynystyq sáıkessizdikke qatysy joq aýrýlardy emdeýge ruqsat etiledi.

Sýdıalar alqasyndaǵy úsh adam bul sheshimdi synǵa aldy. Sýdıa Sonıa Sotomaıor bul sheshim transgender balalar men olardyń otbasylaryn saıası sheshimderdiń erkine tastap qoıǵanyn atap ótti.

Aıta keteıik, AQSh prezıdenti Donald Tramp qyzmetke kiriskennen keıin elde tek áıel jáne er jynysyn ǵana moıyndaıtyn jarlyqqa qol qoıdy. Sondaı-aq ol transgender sportshy qyzdarǵa áıelder jarysyna qatysýǵa, al transgender áskerı qyzmetkerlerge ásker qatarynda qyzmet etýge tyıym saldy.

Vengrııa Parlamenti de tek eki jynysty moıyndaý týraly zańdy maquldaǵan bolatyn.