JI neırohırýrgııada: terini kespeı, isikti dál anyqtaýǵa bolady
ASTANA. KAZINFORM — Jasandy ıntellekt (JI) medıtsınada, ásirese neırohırýrgııa salasynda jańa múmkindikterge jol ashyp otyr. JI kómegimen 700-den asa ota jasaǵan neırohırýrg Abylaı Serikbaı Jibek Joly telearnasynyń «Búgin LIVE» baǵdarlamasynda osy tehnologııanyń artyqshylyqtaryn aıtyp berdi.
Abylaı Serikbaıdyń aıtýynsha, JI dárigerlerge kúrdeli sheshimderdi dál qabyldaýǵa kómektesedi.
— Neırohırýrgııa salasyndaǵy JI degen ne? Bul úlken kólemdegi málimetterdi taldap, olardyń zańdylyqtaryn anyqtap, dárigerlerge naqtyraq sheshim qabyldaýǵa kómektesetin tehnologııa. Bizdiń tájirıbemizdi alatyn bolsaq, neıronavıgatsııa — jáı ǵana qural. Al biz sol navıgatsııaǵa JI kómegimen daıyndalǵan MRT sýretterin engizip, operatsııa kezinde naqty sheshim qabyldaýǵa múmkindik alamyz. Biz operatsııaǵa deıin MRT sýretterin óńdeımiz. Mysaly, isik pen júıke joldarynyń óte mańyzdy qarym-qatynasyn, isiktiń naqty shekarasyn, mańyzdy fýnktsıonaldyq aımaqtardy anyqtap, kórsete alamyz, — deıdi neırohırýrg.
Onyń sózinshe, bul tehnologııa operatsııa barysynda da keńinen qoldanylady.
— Biz muny tek operatsııaǵa deıin qoldanbaımyz. Ony operatsııa kezinde de neıronavıgatsııalyq júıege engizip, ota barysynda qoldana alamyz. Naqtyraq aıtsaq, naýqastyń terisin de kespeı jatyp, isiktiń shekarasyn anyqtaımyz. Sosyn kishkentaı ǵana jerdi kesip, naqty bizge kerek jerge túsip, ota jasaýǵa múmkindik bar. Bul bizge ýaqyt únemdeýge kómektesedi. Bizge deıingi radıologtar qolmen eseptep, isiktiń shekarasyn anyqtap otyratyn. Biraq qazir biz ony arnaıy baǵdarlamaǵa engizip, birneshe mınýttyń ishinde bile alamyz. Árıne, onyń artynan tekserip shyǵady. Óıtkeni ol oınaıtyn nárse emes, adam densaýlyǵy. Ár mıllımetr biz úshin mańyzdy. Bir mıllımetr artyq kesip alsaq, naýqastyń mańyzdy fýnktsııasy zaqymdanýy múmkin, — deıdi stýdııa qonaǵy.
Dáriger sondaı-aq óz tájirıbesindegi eń uzaq operatsııalardyń biri týraly da aıtyp berdi.
— Meniń eń uzaq jasaǵan otam 22 saǵatqa sozyldy. Bul kúndelikti jasalatyn operatsııa emes. Biraq keı jaǵdaılarda jasaýǵa týra keledi. 19 saǵat tek ózim jasaǵan otam da bar. Biraq bul operatsııada áriptesimmen aýysyp otyrdyq: ol bastady, sosyn men ony aýystyrdym, arasynda 3-4 saǵat uıyqtap aldyq. Biraq Qudaıǵa shúkir, bári jaqsy ótti. Naýqas óz aıaǵymen, kóńildi bolyp úıine oraldy. Ota óte kúrdeli boldy, — deıdi Abylaı Serikbaı.
Mamannyń sózinshe, qazirgi tehnologııalardyń damýy neırohırýrgııadaǵy operatsııalardyń dáldigin arttyryp, naýqastardyń saýyǵý múmkindigin edáýir jaqsartýǵa sep bolyp otyr.
Buǵan deıin Qazaqstanda osy saladaǵy kúrdeli otalardyń 80% el ishinde jasalatyny aıtyldy.
