Jınalysta qalǵyp otyratyn sheneýnikterdi jaýapqa tartý múmkin emes

AQTÓBE. QazAqparat - Mańyzdy jınalystarda qalǵyp otyratyn memlekettik qyzmetshilerdi zań aıasynda jaýapqa tartý múmkin emes. Óıtkeni, «Memlekettik qyzmet týraly» zańda mundaı tarmaqtar qarastyrylmaǵan. QR Memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblysy boıynsha departamentiniń basshysy, ádep jónindegi keńes tóraǵasy Qaıyrjan Tokýshev jýrnalısterdiń qalǵyp-múlgip otyratyn memlekettik qyzmetkerler týraly saýalyna osylaı jaýap berdi, dep habarlaıdy QazAqparat tilshisi.

«Qalǵyp ketý degen nárseniń ózin dáleldeý óte qıyn. Ol adam kózin jumyp qalýy múmkin. Al, endi ol adamǵa «sen osyndaı jınalysta uıyqtap qalypsyń deseń, ol moıyndamaıdy eshqashan. Dáleldeý úshin onyń qasynda birneshe adam kýá bolýy kerek. Jalpy, «Memlekettik qyzmet týraly» Zańda dál osyǵan qatysty norma joq. Bálkim, qabyldaǵan kezde zańgerler ondaı másele bolmaıdy dep oılaǵan shyǵar»,- deıdi Q.Tokýshev.

Esterińizge salsaq, buǵan deıin áleýmettik jeliler men birqatar saıttarda mańyzdy jınalys kezinde qalǵyp otyrǵan Aqtóbe qalasynyń ákimi Іlııas Ispanovtyń  vıdeosy taraǵan bolatyn.

Zada Zeıin