Jınalǵan astyqty saqtaý boıynsha birqatar shara qabyldandy – AShM

ASTANA. KAZINFORM – Astyqty qabyldaý kásiporyndaryna jańa eginnen 7,2 mln tonna astyq kelip tústi. Onyń 5,2 mln tonnasy – bıdaı. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov aıtty.

Spıkerdiń aıtýynsha, jınalǵan astyqtyń saqtalýyn qamtamasyz etý úshin birqatar shara qabyldandy. 

«Qazirgi ýaqytta lıtsenzııalyq elevatorlar 43 paıyzǵa júkteldi. Bul rette elevatorlardyń táýlik boıy jumys isteýi qamtamasyz etildi. Astyqty qabyldaý kásiporyndaryna jańa eginnen barlyǵy 7,2 mln tonna astyq kelip tústi. Onyń 5,2 mln tonnasy – bıdaı. Jınalǵan astyqtyń qalǵan kólemi fermerde saqtalýda», - dedi vıtse-mınıstr.

Naryqtyń retteýshilik áser etýi maqsatynda Azyq-túlik korporatsııasy fermerlerden astyq satyp alý sharalaryn qabyldaýda. Bıylǵy jyldyń forvardyq kelisimsharttary boıynsha, sondaı-aq, ótken jylǵy uzartýlardy eskere otyryp, Azyq-túlik korporatsııasy 1,2 mln tonna astyq satyp alady. Qazirgi ýaqytta 550 myń tonna nemese 46 paıyz astyq alyndy.

«Prezıdent tapsyrmasyn oryndaý aıasynda jańa egin astyǵyn tikeleı satyp alý júzege asyrylady. Birinshi kezeńde Úkimet rezervinen 10 mlrd teńge qarajat bólý esebimen 150 myń tonna ónimdi naryq baǵasymen satyp alý usynylady. Astyqty úlken kólemde satyp alý úshin 75 mlrd teńge mólsherinde qosymsha qarjylandyrý qajet etildi», - dedi A. Sultanov.

Eske sala keteıik, 2025 jylǵy kóktemgi egis jáne egin jınaý jumystaryn qarjylandyrý kólemin 100 mlrd teńgege jetkizý josparlanýda. 2025 jylǵy kóktemgi egis jáne egin jınaý jumystary erterek qarjylandyrady.

Sondaı-aq, birinshi kezekte shaǵyn qojalyqtardan astyq satyp alynady.