Jınaq bar, ótinish joq: 2025 jyly 37 mlrd teńge zeınetaqy ıesin tappaı otyr
ASTANA. KAZINFORM — Elimizde zeınetke shyqqanymen, jınaǵyn almaı júrgender sany 260 myńnan asty, dep habarlaıdy «BJZQ» AQ baspasóz qyzmeti.
Jyl saıyn BJZQ «Azamattarǵa arnalǵan úkimet» memlekettik korporatsııasymen birigip BJZQ-da mindetti zeınetaqy jarnalary, mindetti kásiptik zeınetaqy jarnalary esebinen zeınetaqy jınaqtary bar, biraq olar boıynsha zeınetaqy tólemin alý úshin BJZQ-ǵa júginbegen zeınet jasyna tolǵan tulǵalar boıynsha halyqty áleýmettik qorǵaý salasyndaǵy ýákiletti organnyń aqparattyq júıesinde atalǵan adamdarǵa bıýdjet qarajaty esebinen taǵaıyndalǵan jasyna baılanysty jáne memlekettik bazalyq zeınetaqy tólemderiniń bar-joqtyǵyna salystyryp tekserý jumystaryn júrgizedi.
— 2025 jylǵy 1 maýsymdaǵy jaǵdaı boıynsha jalpyǵa birdeı belgilengen zeınet jasyna jetken tulǵalardyń talap etilmegen zeınetaqy jınaqtarynyń jalpy somasy — shamamen 37,3 mlrd teńge, bul soma 264 695 jeke zeınetaqy shotynda (JZSh) saqtalǵan, — delingen qor habarlamasynda.
Onyń ishinde BJZQ-nyń memlekettik organdardyń aqparattyq júıelerinen alǵan málimetterine sáıkes:
— 148 335 adam qaıtlys bolǵan, olardyń zeınetaqy jınaqtaryn muragerler talap ete alady;
— 59 800 adam Qazaqstannan tys jerlerge turaqty turýǵa ketti;
— 56 560 adam jasyna baılanysty zeınetaqylaryn resimdeý úshin Memlekettik korporatsııaǵa (turǵylyqty jeri boıynsha HQKO) áli ótinish bermegen.
Talap etilmegen zeınetaqy jınaqtarynyń jaı-kúıi qalaı bolmaq
Zeınetaqy jınaqtarynyń esebin BJZQ júrgizedi. Talap etilmegen zeınetaqy jınaqtary ınvestıtsııalanýyn jalǵastyryp, salymshylardyń jeke zeınetaqy shottarynda alýshylar ne olardyń muragerleri (salymshy qaıtys bolǵan jaǵdaıda) talap etkenge deıin saqtalady. Qosymsha tabys alý maqsatynda ınvestıtsııalaýmen QR Ulttyq Banki jáne ınvestıtsııalyq portfeldi jeke basqarýshylar (IPB) aınalysady.
Talap etilmegen zeınetaqy jınaqtary tólemin qalaı alýǵa bolady
Eger zeınetker jınaǵynan tólem resimdeýge ótinish bermese
zeınetkerlik jasqa jetýine baılanysty zeınetaqy jarnalarynyń mindetti túrleri esebinen BJZQ-dan zeınetaqy tólemderin taǵaıyndaý, sondaı-aq memlekettik bıýdjetten bazalyq jáne yntymaqty zeınetaqy taǵaıyndaý úshin alýshylar turǵylyqty jeri boıynsha «Azamattarǵa arnalǵan úkimet» memlekettik korporatsııasyna (HQKO) júginýi qajet.
Shetelge turaqty turýǵa ketken kezde
Qazaqstannan tys jerlerge turaqty turýǵa ketýine baılanysty BJZQ-dan zeınetaqy tólemderin alý quqyǵyn elden tys jerlerge turaqty turýǵa ketken, BJZQ-da zeınetaqy jınaqtary bar jáne otandyq zańnamaǵa sáıkes qajet qujattardy usynǵan sheteldikter men azamattyǵy joq adamdar paıdalana alady.
Zeınetaqy jınaqtary bar adamnyń qaıtys bolýyna baılanysty
BJZQ-da zeınetaqy jınaqtary bar adam qaıtys bolǵan jaǵdaıda, onyń otbasy múshelerine respýblıkalyq bıýdjet týraly zańda tıisti qarjy jylyna belgilengen 94 eselengen aılyq eseptik kórsetkish mólsheri sheginde qaıtys bolǵan adamnyń zeınetaqy jınaqtary qarajaty esebinen, biraq qaıtys bolǵan adamnyń JZSh-da bar qarajatynan aspaıtyn mólsherde jerleýge birjolǵy tólem júrgiziledi.
Qordyń málimetinshe, zeınetaqy jınaqtary Qazaqstan Respýblıkasynyń zańnamasynda belgilengen tártippen muraǵa qaldyrylady.
— Zeınetaqy jınaqtary bar adam qaıtys bolǵannan keıin 6 aı ishinde onyń muragerleri qaıtys bolǵan adamnyń zeınetaqy jınaqtary túrindegi muragerlik múlikti resimdeý jáne muragerlik quqyǵy týraly kýálik alý úshin notarıýsqa júginýge tıis. Eger ótinish berý merzimi ótip ketse, muragerlik quqyǵyn qalpyna keltirý úshin sot organdaryna júginý qajet, — delingen BJZQ taratqan aqparatta.
Aıta keteıik, zeınetaqy tólemderiniń túrine jáne ótinish berý tásiline baılanysty zeınetaqy tólemderin alýǵa qajetti qujattardyń tizimi enpf.kz saıtyndaǵy «Qyzmetter — zeınetaqy tólemderi» bóliminde jarııalanǵan.
Buǵan deıin Eńbek mınıstri óziniń qansha zeınetaqy alýy múmkin ekenin aıtty.