Jınaǵan aqshasyn qaıyrymdylyqqa jumsaǵan qarııaǵa Bas múftı erekshe syı jasady
PAVLODAR. KAZINFORM – Pavlodar oblysynyń bas ımamy Joldas qajy Qospaquly qajylyqqa jınaǵan qarjysyn muqtaj balalarǵa bólip bergen 93 jastaǵy Saǵadat Jumabaevpen kezdesti. Qarııaǵa bas múftıdiń atynan kishi jáne úlken qajylyqqa joldama berildi.
Oblys ortalyǵyndaǵy qarttar úıin mekendeıtin aqsaqal Saǵadat Jumabaevtyń múgedek jetkinshekterge jasaǵan jaqsylyǵy ózine qaıtyp keldi. Oǵan elimizdiń bas múftıi atynan qajylyqqa tegin baryp, qaıtý múmkindigi usynylyp otyr.
– Biz sizdiń jasaǵan saýapty isińizge kýá boldyq. Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly meni sizge arnaıy jiberdi. Ózińizge duǵaı-duǵaı sálem aıtyp, saýapty isińizge shynaıy alǵysyn bildirip jatyr. Densaýlyǵyńyz jarap jatsa, kelesi jyly úlken qajylyqqa aparýǵa daıynbyz. Ondaı bolmaǵan jaǵdaıda bıyl kishi qajylyqqa jibereıik. Janyńyzǵa arnaıy adam qosyp beremiz, barlyq uıymdastyrý jumysyn ózimiz qolǵa alamyz, - dedi oblystyń bas ımamy Joldas qajy Qospaquly.
Bul jańalyqty estigen qarııa erekshe qýanyp, rızashylyǵyn bildirdi.
– Aqsaqal retinde qurmettep, hat joldaǵandaryńyzǵa rahmet. Jalǵyz bolǵannan keıin bara almaımyn dep júrdim. Eger mundaı kómek bolatyn bolsa, úlken qajylyqqa barǵym keledi, - degen tańdaýyn bildirdi Saǵadat Jumabaev.
Buǵan deıin 93 jastaǵy aqsaqal qajylyqqa dep jınaǵan aqshasyn múgedek balalarǵa úlestirip bergeni týraly jazǵanbyz.