Jyn shyǵaratyn emshide bolǵan 9 jastaǵy qyz psıhologııalyq kómek alyp jatyr
ASTANA. KAZINFORM – Balalardyń quqyqtaryn qorǵaý komıteti bul jaǵdaıdy baqylaýyna aldy.
- Qazir balaǵa kásibı psıhologııalyq kómek kórsetilip jatyr. Oqıǵa ornynda balalar quqyqtary jónindegi óńirlik ýákil jumys istep jatyr. Balanyń densaýlyǵy men ál-aýqatyna qaýip tóndiretin kez kelgen mundaı áreketterge jol berilmeıdi, - delingen Balalardyń quqyqtaryn qorǵaý komıteti taratqan habarlamada.
Osy oraıda Oqý-aǵartý mınıstrligi balalardyń quqyǵyn qorǵaýdy qamtamasyz etetin zańdar men normalardy saqtaý qajettigin eske salady.
Buǵan deıin áleýmettik jelide ıslam medıtsınasymen jyn shyǵarǵan emshi Keıkýat Ospanovtyń áreketi talqyǵa túsip jatqany jaıly habarlaǵan edik.
Belgili bolǵandaı, balalardan jyn shyǵaratyn emshi buryn Atyraýdaǵy meshittiń kúzetshisi bolǵan.
Sondaı-aq, Atyraý oblystyq Polıtsııa departamentiniń baspasóz qyzmeti áleýmettik jelide taraǵan vıdeo tekserilip jatqanyn habarlady.