Jymqyrylǵan mıllıardtar: ShQO-da qurylys kompanııalaryna qatysty tergeý júrgizilip jatyr

ÓSKEMEN.KAZINFORM – Shyǵys Qazaqstan oblysynda aldanǵan úleskerler eki mıllıard teńgeden astam qarjysynan aıyryldy. Osyǵan baılanysty birqatar qurylys kompanııasyna qatysty qylmystyq is qozǵaldy.

Sonyń biri – «Royal Finance Group» kompanııasy salǵan «Emeralds» turǵyn úı kesheni. Kompanııa basshylaryna qatysty qylmystyq is qozǵalǵan.

- Sot aıyptalýshylardy úleskerlerdiń qarajatyn jymqyrǵany úshin alty jáne jeti jylǵa bas bostandyǵynan aıyrdy. Úkim áli zańdy kúshine engen joq. Іs materıaldary apellıatsııalyq satyda qaralyp jatyr, - dep habarlady ShQO boıynsha Ekonomıkalyq tergeý departamentinen.

«Emeralds» kesheniniń qurylysyna barlyǵy 106 úlesker tartylyp, 115 páterge kelisimshart jasaǵan. Keltirilgen jalpy zalal mólsheri - 1,8 mıllıard teńge.

- Nysanda alǵashqy eki bloktyń alty qabaty jáne úshinshi men tórtinshi bloktardyń bes qabaty turǵyzylǵan. Daıyndyq deńgeıi - 35 paıyz. Búginde qurylys jumystary toqtap tur, - dedi ShQO memlekettik Sáýlet-qurylys baqylaý basqarmasy basshysynyń orynbasary Samat Qaıyrdınov.

Al «Diamond» turǵyn úı keshenine 48 úlesker tartylǵan.

- Atalǵan nysan boıynsha «KJK» AQ kepildigi bar. 2024 jylǵy 28 tamyzda kepildik jaǵdaıy tirkelip, endi qurylysty memlekettik kompanııa júrgizip keledi. Qazirgi tańda tórt qabat turǵyzylyp, jalpy daıyndyq deńgeıi 20 paıyz boldy, - dedi S.Qaıyrdınov.

Buǵan qosa, basqarma ınternet-resýrstarǵa monıtorıng júrgizý barysynda ruqsat qujattaryn rásimdemeı páter satý týraly jarnama jasaǵandardy anyqtaǵan. Zańbuzýshylyqtar jeti turǵyn úı keshenine qatysty tirkeldi. Atap aıtqanda, «Muztau», «Park Line», «Grant Residence», «Asyl Tay», «Riverside», «Renesans 3» jáne «Viva Park».

- Bul nysandar boıynsha qalalyq sáýlet bólimi men prokýratýraǵa tıisti hattar joldandy. «Viva Park» kesheni boıynsha birinshi satydaǵy sot jarnamany toqtatý týraly sheshim shyǵardy. Sebebi qurylys salýshyda ruqsat qujattary bolmaǵan. Úkim áli zańdy kúshine engen joq, — dedi basqarma basshysynyń orynbasary.

Eske salsaq, osyǵan deıin 2026 jyly úlesker retinde alǵan páterin satqandardyń bir bóligi salyqtan bosatylatyny habarlanǵan.