JI mamandaryn óńirlerge arnaıy shaqyrý usynyldy — Quryltaı

QYZYLORDA. KAZINFORM — Q.Jubanov atyndaǵy Aqtóbe memlekettik ýnıversıtetiniń rektory, Ulttyq quryltaı múshesi Laýra Qarabasova tsıfrlandyrý jáne jasandy ıntellekt salasyndaǵy kadr daıarlaý máselesin kóterdi.

— Jasandy ıntellekt — oılaý, eńbek, bilim júıesin ózgertetin órkenıettik betburys. Joǵary oqý oryndary bul protsesten qalys qalmaýy úshin myqty praktık mamandar kerek. Alaıda eńbek naryǵynda ýnıversıtetter bıznes-sektormen teń dárejede básekelese almaıdy. Sondyqtan tsıfrlandyrý jáne jasandy ıntellekt baǵytyndaǵy bilim berý baǵdarlamalaryn qarjylandyrýdyń tıimdi tetikterin qarastyrý qajettigi týyndap otyr, — dedi Laýra Qarabasova Qyzylordada Ulttyq quryltaıdyń V otyrysynda.

Oǵan qosa, ýnıversıtet rektory postdoktorantýra baǵdarlamalary arqyly jasandy ıntellekt salasyndaǵy bilikti jas ǵalymdardy óńirlerge maqsatty túrde tartýdy usyndy. Olar tek zertteýmen shektelmeı, óńir jastaryna ozyq tehnologııalardy ıgerýge jol silteıtin tálimger rólin atqarýy tıis.

— Bul qadam óńirlerdegi tsıfrlyq teńsizdikti joıyp, talantty jastardyń jańa tehnologııalardy meńgerýine jol ashady. Jastardyń kásibı qalyptasýyna, memlekettik basqarýǵa, el damýyna úles qosýyna múmkindik beretin elimizdegi bastamalar úmit berip, alǵa jeteleıdi. Oǵan Prezıdenttik jastar kadr rezervi, kásipkerlik pen jumysshy jastardy qoldaý, kreatıvti ındýstrııany damytý naqty mysal bola alady, — dedi L. Qarabasova.

Buǵan deıin Memleket basshysy Qasym-Jomart Toqaev tsıfrlandyrý jáne jasandy ıntellekt jyly nátıjeli bolýy keregin tapsyrǵan edi.