Jyljymaıtyn múliktiń biryńǵaı memlekettik kadastry boıynsha 100 mln ótinim tústi

ASTANA. KAZINFORM — Qazaqstandaǵy halyqqa qyzmet kórsetý ortalyqtarynda «Jyljymaıtyn múliktiń biryńǵaı memlekettik kadastry» aqparattyq júıesi iske qosylǵaly 1,5 jyldan beri aqparat alý úshin 100 mln-ǵa jýyq suranys óńdeldi.

«Azamattarǵa arnalǵan úkimet» memlekettik korporatsııasy» KEAQ BQO fılıalynan málim etkenindeı, platforma qazaqstandyqtar úshin kúnnen-kúnge qolaıly ári tanymal bolyp keledi.

Jeke tulǵalarda jyljymaıtyn múliktiń joqtyǵy týraly 44 mln anyqtama berildi, bul suranys mólsheri boıynsha kósh basynda.

Korporatsııa málimeti boıynsha 2023 jyldyń 1 shildesinde engizilgen atalmysh kadastr júıesi jer jáne quqyqtyq kadastrlyq derekterdi biriktirý arqyly jyljymaıtyn múlik jáne jer qatynastary salasyndaǵy memlekettik qyzmetterdi alý protsesin qarapaıym ári yńǵaıly etti. 

Búgingi tańda jyljymaıtyn múlik boıynsha 8 jáne jer kadastry boıynsha 4 qyzmet kórsetiledi. Onyń ishinde — quqyq belgileıtin qujattardyń, tehnıkalyq tólqujattyń, jer ýchaskesiniń kadastrlyq pasportynyń telnusqalaryn alý, sondaı-aq memlekettik kadastrlyq kartaǵa tsıfrlyq ıpotekany tirkeý.

Jyljymaıtyn múlikke tehnıkalyq qujat pen jer ýchaskesi aktisin bir qujatqa, ıaǵnı kadastrlyq tólqujatqa biriktirý negizgi ózgeristiń birine aınaldy. Júıe iske qosylǵannan beri mundaı 813 716 tólqujat berildi.

— Kadastrdyń zamanaýı tsıfrlyq ekojúıesi ekinshi deńgeıli bankterdiń mobıldi qosymshalary jáne platformalarymen ıntegratsııalanýy arqyly qoljetimdilikti qamtamasyz etti. Aıta ketý kerek, kadastr elimizdiń tsıfrlyq ınfraqurylymyn damytýdaǵy mańyzdy qadam bolyp sanalyp, azamattarǵa jańa múmkindikterge jol ashady, — dep habarlady vedomstvodan.

Eske sala keteıik, budan buryn qazaqstandyqtardyń memlekettik qyzmetti úıden shyqpaı ala alatynyn jazǵan bolatynbyz.