Jyljymaıtyn múlik úlesine ınvestıtsııa salý múmkindigi iske qosylady
ASTANA. KAZINFORM — Elimizde páterdi tolyq satyp almaı-aq, jyljymaıtyn múliktiń belgili bir úlesine ınvestıtsııa salý múmkindigin iske qosý josparlanǵan. Bul týraly Jasandy ıntellekt jáne tsıfrlyq damý vıtse-mınıstri Ǵızzat Baıtursynov málim etti.
Úkimet otyrysynan keıingi baspasóz máslıhaty barysynda ol jańa fýnktsııany Baspana Hub platformasynda engizý josparlanǵanyn aıtty. Atalǵan platforma turǵyn úıge qatysty negizgi qyzmetterdiń barlyǵyn biriktiredi. Paıdalanýshylar osy platforma arqyly jyljymaıtyn múlik izdep, ol týraly qajetti aqparatty ala alady.
— Sonymen qatar platformada jyljymaıtyn múlikti tokenızatsııalaý fýnktsııasyn iske qosý josparlanyp otyr. Bul azamattarǵa páterdi tolyq satyp almaı-aq, onyń belgili bir úlesine ınvestıtsııa salýǵa múmkindik beredi, — dedi Ǵızzat Baıtursynov.
Onyń aıtýynsha, qazir bul modeldi retteý, banktermen ıntegratsııalaý jáne platformanyń servısterin keńeıtý máseleleri pysyqtalyp jatyr.
Buǵan deıin QR-tólemderdi QQS-tan bosatý máselesi pysyqtalyp jatqanyn jazdyq.
