Jylýmen jáne elektr energııasymen qamtamasyz etý: ákimdikterge tapsyrma berildi
ASTANA.KAZINFORM - Energetıka mınıstrliginiń Memlekettik energetıkalyq baqylaý jáne qadaǵalaý komıtetinde 2026–2027 jyldardaǵy jylytý maýsymyna energetıkalyq keshen men ınfraqurylymdy daıyndaý máseleleri boıynsha Respýblıkalyq shtabtyń kezekti otyrysy ótti.
Otyrysqa «KEGOC», «Samuryq-Energo», «OAEK», «Qazaqstan temir joly» UK, «QazaqGaz Aimaq», «QazMunaıGaz» UK, «Qarajyra», «Intergaz Ortalyq Azııa», «Qazaqstandyq kommýnaldyq júıeler» JShS ókilderi, sondaı-aq óńirler ákimdikteriniń jáne eldiń energetıkalyq kásiporyndarynyń basshylyǵy qatysty.
Otyrysty ashqan Komıtet tóraǵasy Erjan Ertaev aldaǵy jylytý maýsymynan senimdi ótýdi qamtamasyz etý salanyń basty mindetteriniń biri bolyp qala beretinin atap ótti.
– Basty mindet – aldaǵy kúzgi-qysqy kezeńde halyqty jylýmen jáne elektr energııasymen turaqty qamtamasyz etý. Ol úshin barlyq jóndeý jumystary sapaly, tolyq kólemde jáne belgilengen merzimde oryndalýy tıis. Árbir kásiporyn basshysy nátıjege jeke jaýapty, – dedi Erjan Ertaev.
Otyrys barysynda elektr stantsııalaryndaǵy jóndeý naýqanynyń oryndalýy, jylý jáne elektr jelileriniń daıyndyǵy, Biryńǵaı elektr energetıkalyq júıeniń turaqty jumysy, otyn qorlaryn jınaqtaý, óńirlerdi gazben qamtamasyz etý jáne kómir tasymalyn uıymdastyrý máseleleri qaraldy.
Barlyq óńirde aýqymdy jóndeý naýqany bekitilgen kestelerge sáıkes júrgizilip jatqany atalyp ótti. Búginde elektr stantsııalarynda negizgi jabdyqtardyń 16 birligine – 2 energoblokqa, 10 qazandyqqa jáne 4 týrbınaǵa kúrdeli jóndeý jumystary aıaqtaldy. 2 energoblokta, 26 qazandyqta jáne 16 týrbınada jóndeý jumystary jalǵasyp jatyr.
Elektr jelilerinde shamamen 4,8 myń shaqyrym elektr berý jelisi, 107 qosalqy stantsııa jáne 1065 taratý pýnkti jóndeldi. Bul jyldyq jospardyń bir bóligi bolyp sanalady. Jyl sońyna deıin 17 098 shaqyrym elektr jelisin, 444 qosalqy stantsııany jáne 3408 taratý pýnktin jóndeý kózdelgen.
Jylý jelileri boıynsha qaıta jańǵyrtý jáne kúrdeli jóndeýge josparlanǵan 377 shaqyrymnyń 213 shaqyrymynda jumystar júrgizilip jatyr, onyń ishinde 52 shaqyrymy tolyq aıaqtaldy.
Otyrysqa qatysýshylar qysqy kezeńge daıyndyq barysynda erekshe baqylaýdy qajet etetin máselelerdi talqylady. Energetıkalyq kásiporyndar men ákimdikterdiń basshylary energoobektilerdiń senimdi jumysyn qamtamasyz etý, jóndeý baǵdarlamalaryn oryndaý jáne ınfraqurylymdyq jobalardy ýaqytyly aıaqtaý boıynsha qabyldanyp jatqan sharalar týraly baıandady.
Jóndeý jumystarynyń uıymdastyrylýy men merzimderine qatysty táýekelder saqtalyp otyrǵan nysandar men óńirlerge erekshe nazar aýdaryldy. Kásiporyn basshylary men jergilikti atqarýshy organdarǵa táýekelderdi joıý boıynsha barlyq qajetti sharany qabyldaý jáne jylytý maýsymy bastalǵanǵa deıin josparlanǵan jumystardyń tolyq oryndalýyn qamtamasyz etý tapsyryldy.
Otyrys qorytyndysy boıynsha energetıkalyq kásiporyndarǵa jóndeý baǵdarlamalarynyń sózsiz oryndalýyn qamtamasyz etý jáne jabdyqtardyń tehnıkalyq jaǵdaıyna baqylaýdy kúsheıtý tapsyryldy. Ákimdikterge jylýmen jabdyqtaý jáne elektr jelileri keshenindegi jumystardy ýaqytyly aıaqtaý úshin qajetti sharalardy qabyldaý júkteldi.
Komıtettiń aýmaqtyq departamentterine apta saıyn energoobektilerdiń daıyndyǵyna monıtorıng júrgizý jáne týyndaǵan táýekelderge jedel áreket etý tapsyryldy.
Otyrysty qorytyndylaı kele, Erjan Ertaev jylytý maýsymyna daıyndyq jónindegi barlyq is-shara belgilengen merzimde aıaqtalýy tıis ekenin jáne daıyndyq barysy barlyq jaýapty uıymdardyń turaqty baqylaýynda bolýy qajet ekenin atap ótti.
Aıta keteıik, Úkimet Abaı oblysynyń jylý jelilerin jylytý maýsymyna daıyndaýǵa 2,5 mlrd teńge bóldi.
