Jylý jelileri men kómir qory: Qaraǵandy oblysynyń aýdandary qysqa daıyndalyp jatyr
QARAǴANDY. KAZINFORM – Qaraǵandy oblysynda aldaǵy jylytý kezeńine keshendi daıyndyq jumystary qyzý júrgizilip jatyr. Aýdandarda turǵyn úı qorlarynyń jylý júıelerin jańartý, kómir qoryn tolyqtyrý jáne áleýmettik nysandardyń ınfraqurylymyn jetildirý sharalary sońǵy satyda.
Buqar jyraý aýdany
Ortalyqtandyrylǵan jylý júıesine qosylǵan turǵyn úılerdiń daıyndyǵy 60%-ǵa jetti. 1 qyrkúıekke deıin bilim berý, densaýlyq saqtaý jáne mádenıet salasynyń mekemelerine otyn jetkizý tolyq aıaqtalýǵa tıis. Qazandyqtar men jylý jelilerinde josparly jóndeý jumystary júıeli túrde jalǵasýda.
— Qýshoqy aýylynda jylytý maýsymyna daıyndyq sheńberinde kómir jetkizý jáne kúl shyǵarý konveıerleri, ortalyq qazandyqtaǵy №4 qazan jóndelip jatyr, sondaı-aq oramishilik jylý jelileri jańartylýda, — deıdi aýdan ákimi Erlan Qusaıyn. — Jeti modýldik qazandyqtyń jumysyn jańǵyrtýǵa jáne qýattylyǵyn arttyrýǵa erekshe kóńil bólingen. Sonymen qatar, bilim berý nysandaryna arnalǵan tórt jańa blok-modýldi qazandyqtyń qurylysy qarqyndy júrip jatyr.
Qarqaraly aýdany
Jylý jelilerin jańartý jumystary 90%-dan asty. №1 qazandyqqa qýaty 1,2 MVt bolatyn qosymsha qazan agregaty ornatyldy. Barlyq qazandyqtarda aǵymdaǵy jóndeý jumystary qarqyndy júrip jatyr. Sonymen qatar, sý jáne káriz jelilerin aýystyrý jumystary bir ýaqytta júrgizilýde.
Búrkitti aýylyndaǵy mádenıet úıinde jylytý júıesin jańartý aıasynda kúrdeli jóndeý júrgizildi. Halyq pen áleýmettik nysandarǵa qajetti kómir qory qalyptasqan.
Shet aýdany
28 jıyntyq transformatorlyq qosalqy stantsııa, transformatorlar, kabelder, ajyratqyshtar jáne basqa da qajetti tehnıkalyq qural-jabdyqtar satyp alyndy.
— Energetıka basqarmasynyń monıtorıng derekteri boıynsha, jylý jáne sý júıeleri 60%-dan astam daıyndyq deńgeıine jetken, al elektr jelileri men qosalqy stantsııalar 70%-ǵa daıyn, — dep atap ótti aýdan ákimi Muhıt Muhtarov. — Sport nysandary tolyǵymen qysqa daıyn, áleýmettik-turmystyq basqa nysandardyń daıyndyǵy shamamen 70% deńgeıinde.
Nura aýdany
Áleýmettik nysandarǵa arnalǵan negizgi kómir qory tolyq qalyptasty. Sý qubyrlary jelisin jóndeý jumystary aıaqtalýǵa jaqyn, al káriz júıelerin qaıta jańartý jumystary áli de jalǵasyp jatyr.Shubarkól kentindegi jalǵyz ortalyq qazandyq tolyq daıyn.
Kertindi men Mynbaeva aýyldaryndaǵy mádenıet úılerine jańa blok-modýldi qazandyqtar ornatyldy, bilim berý mekemelerindegi jylytý júıelerin jóndeý jalǵasýda.
Josparǵa sáıkes, barlyq nysandar 15 qyrkúıekke deıin tolyq daıyn bolýy shart. Aýdan basshylaryna daıyndyq barysyn únemi qatań baqylaýda ustap, jumys qarqynyn tómendetpeý mindetteldi.
Bul oblys turǵyndaryn qysqy maýsymda sapaly jáne úzdiksiz jylýmen qamtamasyz etýge baǵyttalǵan mańyzdy jáne keshendi sharalar.
Osyǵan deıin Qyzylorda oblysyndaǵy jylýmen qamtý nysandaryn jańǵyrtý úshin bıyl 13,5 mlrd teńge bólingenin jazǵan bolatynbyz.