Jylý jáne elektr jelilerin jańǵyrtýǵa 4 trln teńge jumsalady
ASTANA. KAZINFORM — Úkimet otyrysynda QR Energetıka mınıstri Erlan Aqkenjenov respýblıkany jylýmen jáne elektrmen qamtamasyz etý jumystary jóninde málimdeme jasady.
Onyń sózinshe, «Energetıka jáne kommýnaldyq sektorlardy jańǵyrtý» ulttyq jobasynda jylý jáne elektr jelilerin jańǵyrtý qarastyrylǵan.
Atap aıtqanda, 1,6 myń shaqyrym jylý jelisi jańartylyp, oǵan 1,3 trln teńge jumsalmaq.
Al 77,5 myń shaqyrym elektr jelisin jańǵyrtýdyń quny 2,7 trln teńge bolmaq.
— Bul jumystar 2029 jylǵa qaraı el boıynsha jylý jáne elektr jelileriniń ortasha tozý deńgeıin tıisinshe 52%-dan 42% -ǵa jáne 74%-dan 45%-ǵa tómendetýge múmkindik beredi, — dedi mınıstr.
Erlan Aqkenjenovtyń málimdeýinshe, búgingi tańda Energetıka mınıstrligi uzyndyǵy 11 561 shaqyrym elektr jelilerin jańǵyrtý jáne rekonstrýktsııalaý boıynsha somasy 514,5 mlrd teńgelik 246 jobany iske asyrýdy qoldady.
— Qazir 70,2 mlrd teńgeniń 61 jobasy qurylys-montajdaý jumystarynyń ártúrli satysynda. Al 269,7 mlrd teńgeniń 113 jobasy boıynsha EPC-merdigerdi jáne tehnıkalyq qadaǵalaýdy anyqtaý boıynsha satyp alý rásimderi ótip jatyr. Quny 11,2 mlrd teńgelik bir jobanyń tarıfi anyqtalyp jatyr. Sonymen qatar, 163,4 mlrd teńgeniń 71 jobasyn iske asyrýǵa mınıstrlik kelisti jáne ol jobalar qaraýdyń birinshi kezeńinde, — dedi ol.
Aıta keteıik, buǵan deıin elimizde qýaty 7,3 GVt jańa generatsııa kózderi iske qosylatynyn jazǵanbyz.
