Jylý maýsymynda Pavlodar men Aqsýdaǵy JEO-larda kemshilikter jıi tirkelip otyr

PAVLODAR. KAZINFORM - «Eýrazııalyq energetıkalyq korporatsııa» AQ-na qarasty Pavlodar JEO-1 jáne Aqsýdaǵy ROK-2 jylý stansasynda bıyl qysta aqaýlar tirkelgen. Ótken jylý berý kezeńimen salystyrǵanda munda tehnologııalyq zań buzýshylyqtar sany eki esege artqan.

Bul týraly Pavlodar oblysy ákiminiń baspasóz qyzmetinen habarlady. 

- Pavlodar JEO-1 ortalyǵynda tehnologııalyq buzýshylyqtar sany eki esege jýyq artqan. Buzýshylyqtardyń basym bóligi jekelegen qazandyq agregattarynda tirkelgen, al keıbir jabdyqtar belgilengen merzimde kúrdeli jóndeýden ótpegen. Menshik ıesi tarapynan jóndeý naýqanynyń júıeli túrde jetkiliksiz qarjylandyrylýy stansanyń tozý deńgeıiniń joǵarylaýyna ákeldi. Ótken jyldyń qarasha-qańtar aılarynda, sondaı-aq bıylǵy aqpanda №2 týrbınanyń jumysynda kezdesken aqaýlar sonyń aıqyn dáleli. Sol kezde stansa bir táýlik boıy rezervsiz jumys istep, qalanyń ońtústik bóligin turaqty jylýmen qamtamasyz etýge qaýip tóndirdi, - dep málimdedi ákimdikten.

Mundaı táýekelder Aqsý qalasyndaǵy ROK-2 stansasynda da baıqalǵan. Byltyr jeltoqsan aıynda shtattan tys bolǵan jaǵdaı qazandyqtar men qosalqy jabdyqtardyń durys jumys istemeýine aparyp soqtyrǵan. Stansa jumysy jedel túrde qalpyna keltirildi. Barlyq tehnologııalyq buzýshylyqtar boıynsha ýákiletti organdar tekseris júrgizip, anyqtalǵan kemshilikterdi joıý jóninde nusqamalar bergen.

Bıyl oblystyń energııa kózderinde negizgi jabdyqtyń 41 birligin jóndeý josparlanǵan. Onyń ishinde 9 energetıkalyq blok, 24 qazandyq, 6 týrbına jáne 2 tútin murjasy bar.

Buǵan deıin Pavlodarda ábden eskirgen jylý-energııa ortalyǵy jańǵyrtýdan ótetinin jazǵanbyz.