Jylý maýsymyna ázirlik: Ekibastuzda 20 shaqyrymnan astam jeliler jóndeldi
PAVLODAR. KAZINFORM — Ekibastuz qalasy ákimdiginiń aqparynsha, shaharda eki iri jylý magıstrali rekonstrýktsııadan ótken.
Ótken jazda kenshiler shaharynda № 2 jáne № 7 jylý magıstralderine rekonstrýktsııa jasaldy. Onyń alǵashqysyna kópqabatty 30 turǵyn úı men 13 áleýmettik nysan, ekinshisine 109 úı men 11 áleýmettik nysan jalǵanǵan. Jelilerdiń jalpy uzyndyǵy — 5,5 km. Jobalar respýblıkalyq jáne oblystyq bıýdjet kózderinen qarjylandyryldy.
— Qazirgi ýaqytta atalǵan ýchaskede jeli qubyrlaryn montajdaý jumystary aıaqtaldy. Gıdravlıkalyq synaqtar, sondaı-aq jylý jelilerin jýý sátti júrgizildi. Ystyq sý tutynýshylarǵa tolyq kólemde berilip otyr. Buǵan qosa qala boıynsha kúzgi gıdravlıkalyq synaqtar júrgizilip, nátıjesinde 143 aqaý anyqtaldy. Búginde jylýmen qamtý júıesin toltyrý júrgizilip, turǵyndar ystyq sýmen tolyqtaı qamtylyp otyr, — dep habarlady qalalyq ákimdiktiń baspasóz qyzmetinen.
Ekibastuzda sondaı-aq oramishilik jelilerdiń 12 shaqyrymy bıýdjet qarajaty esebinen, taǵy 5,5 shaqyrymy monopolıstiń jeke qarajatyna jóndelgen. Barlyǵy 22,5 shaqyrym jylý jelileri jańartyldy.
Jergilikti JEO-ǵa da da jóndeý júrgizildi. Onda 7 qazandyq bútindelip, onyń ishinde bireýine kúrdeli jóndeý júrgizilgen. Taǵy ekeýine keńeıtilgen aǵymdaǵy jóndeý júrgizilse, qalǵany aǵymdaǵy jóndeýden ótken.
— Qalada 705 kópqabatty turǵyn úı tirkelgen. 2025 jylǵy 29 tamyzdaǵy derek boıynsha 670 úı jylý maýsymyna tolyqtaı daıyn. Qalǵan 35 úıde ishki ınjenerlik jelileri jóndelip jatyr. Jóndeý jumystaryn 5 qyrkúıekte aıaqtaý josparlanǵan, — dep qosty ákimdikten.
Sondaı-aq barlyq áleýmettik nysan (105 nysan) 100% jylýǵa qosylýǵa daıyn tur. Aýyldyq jerlerge 5000 tonna kómir jetkizilgen.
Buǵan deıin Premer-mınıstr jylý berý maýsymyna daıyndyǵy tómen óńirlerdi synaǵan.
Pavlodar oblysynda qazandyqtar men jelilerdegi jóndeý jumystaryn 10 qyrkúıekke deıin aıaqtaý kózdelip otyr.