Jylý maýsymy bastalǵaly Pavlodar jurtynan myńnan astam shaǵym túsken
PAVLODAR. KAZINFORM — Shaǵymnyń eń kóbi oblys ortalyǵynda tirkelgen — 900-den astam. Páter ıeleri negizinen temperatýrany retteýge qatysty máselelerdi kótergen.
Pavlodar oblysynda jylý berý bastalǵaly turǵyndardan páterleriniń jetkilikti jylynbaýyna qatysty myńnan astam shaǵym túsken.
Bul týraly oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Kúlbarshyn Arynova málimdedi.
— Pavlodar qalasynda 900-den astam ótinish tirkeldi. Ekibastuzda — 25, Aqsýda 24 shaǵym túsken Árbir ótinish boıynsha jumys júrgizildi. Negizinen, temperatýrany retteýge qatysty máseleler kóterilgen, — deıdi ol.
«Pavlodar jylý jelileri» JShS-nyń málimetinshe, qazirgi ýaqytta jylý júıeleri shtattyq rejımde jumys istep tur. Іske qosý-baptaý jumystarynyń barlyǵy derlik aıaqtalǵan. Kásiporyn ókilderiniń sózinshe, páterlerdegi radıatorlardy ýaqtyly shaıý nemese úı ishindegi qubyrlardyń tik magıstraldaryn aýystyrý arqyly jylýdyń jetkiliksizdigin joıýǵa bolady. Jylý jelileriniń mamandary tirkelgen ár shaǵym boıynsha páterlerge baryp, jylytý júıesin retteýge kómektesedi.
Eske sala keteıik, Pavlodarda engizilip jatqan tsıfrlyq syńar jylý júıesin naqty ýaqyt rejıminde baqylaýǵa múmkindik beredi.
