Jylý kózderinde tehnologııalyq parametrlerdiń buzylýy jıilep ketti – Premer
ASTANA. KAZINFORM – Premer-mınıstr Oljas Bektenov apatty jaǵdaıdaǵy jylý elektr ortalyqtaryn jańǵyrtý merzimin ózgertýge bolmaıtynyn eskertti.
«Bıyl jylytý maýsymy qalypty jaǵdaıda ótti deýge bolady. Alaıda, iri apattardyń aldyn aldyq degenimizben, jylý kózderindegi tehnologııalyq parametrlerdiń buzylýy jıilep ketken. Úkimettiń keńeıtilgen otyrysynda Memleket basshysy apatty jaǵdaıda turǵan 19 jylý ortalyǵyn jańǵyrtý jumystaryn aıaqtaýdy tapsyrdy. Energetıka mınıstrligi ár obekt boıynsha maǵan apta saıyn baıandap otyrýǵa tıis. Bekitilgen merzimderdi ózgertýge bolmaıdy», - dedi Oljas Bektenov.
Úkimet basshysy jylytý salasynyń mamandaryna jaz boıy kúsheıtilgen rejımde jumys isteýdi tapsyrdy.
«Qys boıy jóndeý jumystaryn júrgizýge májbúr bolǵan Kentaý men Stepnogorskidegi, MAEK pen «Topar» GRES-indegi sııaqty kúrdeli jaǵdaıǵa jetkizbeý qajet. Jaz aılarynda kúsheıtilgen rejımde jumys isteý kerek. Eger jumystar merziminde aıaqtalmaı, sapasy tómendep ketetin bolsa, onda menshik ıelerimen qatar, ákimdikterge qatysty da shara qabyldanady», - dedi Premer-Mınıstr.
