Jylý ınfraqurylymy jańartylǵan Aqtaýda gıdrosynaq bastaldy
AQTAÝ. KAZINFORM – Aqtaý qalasynyń ákimi Ábilqaıyr Baıpaqov qala kúni qarsańynda BAQ ókilderimen kezdesip, áleýmettik-ekonomıkalyq damý, ınfraqurylymdyq jobalardyń júzege asýy jáne aldaǵy josparlar týraly suraqtarǵa jaýap berdi.
Qaladaǵy ózekti máselelerdiń biri – tozyǵy jetken jylý qubyrlaryn jańartý. Bul baǵyttaǵy jumystar bıyl aıaqtaldy.
- 2024 jyly Aqtaý qalasynda uzyndyǵy 11,4 shaqyrym magıstraldyq jylý qubyry aýystyrylǵan bolatyn. Al bıyl jobanyń ekinshi kezeńi aıasynda 10 shaqyrymǵa jýyq jylý jelisi jańartyldy. Úsh jylǵa josparlanǵan jumystar eki jyl ishinde tolyq aıaqtalyp otyr. Qazir qubyrlardy sýmen toltyrý, gıdravlıkalyq synaq jumystary júrgizilip jatyr, - dedi qala ákimi.
Aıtýynsha, synaq jumystary oıdaǵydaı ótse, ystyq sý berile bastaıdy. Al, jylýdyń berilý merzimi kún raıyna baılanysty bolady. Eger josparly merzim, ıaǵnı qazannyń 15-ine deıin kún sýytsa, mamandar jylý berý maýsymyn erte bastaýǵa da daıyn.
Aıta ketsek, Aqtaý qalasynyń jylý jelilerin rekonstrýktsııalaýǵa Úkimet rezervinen 3,6 mlrd teńge bólingen bolatyn.
Kún tártibindegi máseleniń biri – elektr jelileriniń jaı-kúıi. Jalpy uzyndyǵy 22,5 shaqyrym jelini jańartý jumystary júrip jatyr. Jobanyń ekinshi kezeńinde taǵy 23 shaqyrymnan astam elektr jelisi aýystyrylmaq.
- Memleket basshysynyń tapsyrmasyna sáıkes bastalǵan jobanyń nátıjesinde, Aqtaý qalasynda 25 shaǵyn aýdan turaqty jáne sapaly elektr energııasymen qamtamasyz etiledi, - deıdi Ábilqaıyr Baıpaqov.
Bıyl shildeniń aptap ystyǵynda qala turǵyndary elektr energııasynyń jıi óshýine jappaı shaǵymdanǵan edi.
Jýyrda Memleket basshysynyń tapsyrmasyna sáıkes Aqtaý qalasynyń turǵyn úı qurylysy, kólik jáne ınjenerlik ınfraqurylymy, jasyl aımaqtar, óndiristik jáne rekreatsııalyq nysandaryn damytýǵa arnalǵan Bas jospary jańartyldy.