Jylý energetıkasynyń nysanaly kórsetkishterine qol jetkizýge memlekettik qoldaý kórsetiledi
ASTANA. KAZINFORM – Úkimet jylý energetıkasy salasyndaǵy nysanaly kórsetkishterge qol jetkizý úshin memlekettik qarjylyq qoldaý kórsetý qaǵıdalaryn bekitti.
Qujatqa sáıkes, jylý energetıkasynyń nysanaly kórsetkishterine qol jetkizýdi jedeldetý maqsatynda memleket tarapynan qarjylyq qoldaý kórsetiledi. Atap aıtqanda, memlekettik qarjylyq qoldaý birneshe tásil arqyly júzege asyrylady.
– Qazaqstan Respýblıkasynyń bıýdjettik zańnamasyna sáıkes bıýdjettik transfertter, kredıtter jáne sýbsıdııalar bólinedi. Sonymen qatar Qazaqstan Respýblıkasynyń Bıýdjet kodeksiniń 141-babyna sáıkes zańdy tulǵalarǵa jáne kvazımemlekettik sektor sýbektilerine memlekettik emes qaryzdar boıynsha memlekettik kepildikter beriledi, – delingen qujatta.
Eger kútpegen mán-jaılar týyndap, jylýmen jabdyqtaýdy damytý shemalarynda kózdelgen jylý energetıkasynyń nysanaly kórsetkishterine qol jetkizý múmkin bolmasa, respýblıkalyq mańyzy bar qalalardyń, astananyń jáne oblystyq mańyzy bar qalalardyń jergilikti atqarýshy organdary ýákiletti organǵa memlekettik qarjylyq qoldaý kórsetý máselesin qaraý týraly júginedi.
– Kútpegen mán-jaılarǵa eńserilmeıtin kúsh jaǵdaılary men tótenshe jaǵdaılardyń jylýmen jabdyqtaýdy damytý shemalarynda kózdelgen is-sharalardyń oryndalýyna keri áser etýi, sondaı-aq jobalardy iske asyrý shyǵyndarynyń aldyn ala boljanbaǵan ósýi jatady, – dep atap ótilgen habarlamada.
Qaýlyǵa sáıkes, memlekettik qarjylyq qoldaý jylý energetıkasynyń nysanaly kórsetkishterine barynsha jedel qol jetkizý maqsatynda júzege asyrylady. Bul kórsetkishter jylý energetıkalyq ınfraqurylymnyń tozýyn, apattylyq deńgeıin jáne jylý jelileri men qondyrǵylaryndaǵy energııa shyǵyndaryn azaıtýǵa baǵyttalǵan.
Sondaı-aq jergilikti atqarýshy organdardyń bıýdjettik suranymdary jylýmen jabdyqtaýdy damytý shemalarynda kózdelgen nysanaly kórsetkishterge áser etý deńgeıin eskere otyryp qaralady. Memlekettik qarjylyq qoldaý qarajaty jergilikti atqarýshy organdardyń qolma-qol aqshany baqylaý shottaryna aýdarý arqyly júzege asyrylady.
Qaýly 2027 jylǵy 1 qańtardan bastap qoldanysqa engiziledi.
