Jylý berý júıesine tarıfter ózgerýi múmkin - Almasadam Sátqalıev
ASTANA. KAZINFORM – Energetıka mınıstri Almasadam Sátqalıev jylý berý júıesinde tarıfterdi kóterý qajet ekenin aıtty.
«Bul másele kásiporyndardyń ótinishterine baılanysty, ıaǵnı saladaǵy kompanııalardan ótinishter pýly qalyptasqan kezde, biz tıisti jaýap beremiz. Qazir Energetıka mınıstrligine mundaı ótinishter túsken joq. Baǵa belgileý prıntsıpine toqtalsaq, biz aldymen ótinimderdi jınaqtap, berilgen ótinimderdiń sáıkestigine tıisti taldaý júrgizip, sodan keıin tıisti qorytyndyny jasaımyz. Jylýmen jabdyqtaý qyzmeti jaıynda aıtsaq, tarıfti kóterý kerek. Biraq onyń deńgeıi árbir jeke kásiporynǵa baılanysty bolady. Jalpy, jylý elektr ortalyqtarynyń tozýy shamamen 70 paıyzǵa jetken. Osyǵan bul qomaqty ınvestıtsııa qajet. Sondyqtan tarıftiń ósýi pysyqtalýy múmkin», - dedi A.Sátqalıev Parlament Májilisinde tilshiler suraǵyna jaýap bere otyryp.
Onyń aıtýynsha, Qazaqstanda jylý elektr ortalyqtaryn jóndeýge 380 mlrd teńge qarastyrylǵan. Sonyń ishinde 361 mlrd teńgesi tarıfter men atalǵan stantsııalar ıeleriniń qarajaty esebinen baǵyttalady. Qalǵan 20 mlrd teńge Úkimet rezervinen bólinbek.
«Qazaqstan azamattary úshin tarıfterdiń kúrt ósýi bolmaıdy, ıaǵnı eleýli túrde sharyqtamaıdy. Ósim Ulttyq ekonomıka mınıstrligi belgilegen ınflıatsııalyq dáliz aıasynda júzege asyrylady», - dedi mınıstr.
