Jylý berý nysandaryn jóndeý: Bıyl 373 mlrd teńge ıgeriledi
ASTANA. KAZINFORM – Elimizde bıyl jylý berý nysandaryna júrgiziletin jóndeý jumystaryna 373 mlrd teńge jumsalady. Bul týraly Úkimet otyrysynda Energetıka vıtse-mınıstri Suńǵat Esimhanov aıtty.
— Aldaǵy jylytý maýsymyna daıyndyq sheńberinde Júıelik operator bekitken kestege sáıkes aǵymdaǵy jyly elektr stantsııalarynda 10 energııa blogyn, 63 qazandyqty jáne 39 týrbınany jóndeý josparlanǵan. Ártúrli kezeńderde jóndeý jumystary 4 energoblokta, 19 qazandyqta jáne 10 týrbınada júrgizilip jatyr. 1 energoblokta, 2 qazandyqta jáne 1 týrbınada jóndeý jumystary aıaqtaldy, — dedi ol.
Sondaı-aq, vıtse-mınıstr ortalyqtandyrylǵan jylýmen jabdyqtaý aımaǵyndaǵy 44 qazandyqty jóndeý jáne rekonstrýktsııalaý josparlanǵan.
— Energetıkalyq kózder boıynsha joǵaryda atalǵan jóndeý jumystaryna 373 mlrd teńgeni ıgerý josparlanyp otyr, bul ótken jylǵy deńgeıden 14%-ǵa joǵary. Aldyn ala berilgen ótinimderge sáıkes Úkimet rezervinen 25,4 mlrd teńge bólindi, dep túıdi sózin Suńǵat Esimhanov.
Aıta ketelik 2025 jyly jańartylatyn energııa kózderiniń 9 obektisi iske qosylatyny týraly jazǵan bolatynbyz.