Jylý berý maýsymyndaǵy órt: qutqarýshylar elordadaǵy jer úılerge reıd júrgizip jatyr
ASTANA. KAZINFORM – Astanadaǵy eldi mekenderde jáne áleýmettik jaǵynan osal toptar turatyn úılerde órt qaýipsizdigin qamtamasyz etýge baǵyttalǵan respýblıkalyq aldyn alý aktsııasy bastaldy, dep habarlaıdy elorda ákimdiginiń resmı saıty.
Aktsııa aıasynda qalada 50 dana kómirqyshqyl gazynyń datchıgi ornatyldy.
TJM men qalalyq TJD qyzmetkerleri, volonterler, polıtsııa ókilderi, ákimdik qyzmetkerleri jáne «Astana-REK» JShS mamandary Saryarqa aýdany boıynsha úılerdi aralap, turǵyndarǵa órt qaýipsizdigi erejelerin eske saldy. Atap aıtqanda, tútin murjalaryn tazartý, kómirqyshqyl gazy datchıkterin ornatý jáne pesh jabdyqtaryn paıdalanýda saqtyq sharalaryn saqtaý qajettigi túsindirildi.
«Aktsııanyń maqsaty – órttiń paıda bolý qaýpin azaıtý ǵana emes, sonymen qatar azamattardyń úı jaǵdaıyndaǵy qaýipsizdik erejeleri turǵysynan habardarlyǵyn arttyrý.
Erekshe nazar qart adamdar turatyn úıler men kópbalaly otbasylarǵa, sondaı-aq peshpen jylytylatyn turǵyn úılerge aýdarylady», — dedi Astana qalasy TJD ÓQQB ınjeneri Ernazar Qarshyǵa.
Astana qalasy TJD derekterine sáıkes, órtterdiń basym bóligi jeke turǵyn úılerde tirkeledi.
«Taldaý nátıjeleri kórsetkendeı, órttiń negizgi sebepteri – elektr quraldaryn paıdalaný kezinde qaýipsizdik erejelerin buzý (73%), peshpen jylytqanda otty abaısyz qoldaný (13%), sondaı-aq halyqtyń órt qaýipsizdigi talaptary týraly jetkilikti aqparattanbaýy bolyp otyr.
Azamattar kóbine isten shyqqan nemese qoldan jasalǵan jylytý qurylǵylaryn qoldanady, elektr jelilerin shamadan tys júkteıdi, pesh pen tútin murjalarynyń jaǵdaıyn teksermeıdi», — dep túsindirdi mamandar.
Órt qaýipsizdigin qamtamasyz etý maqsatynda Astana qalasy Tótenshe jaǵdaılar departamenti ákimdikpen birlesip 2025-2026 jyldardyń jylytý maýsymyna arnalǵan turǵyn sektorda órttiń aldyn alý sharalarynyń josparyn ázirledi.
«Jylytý maýsymy bastalǵaly beri turǵyn sektor boıynsha 80 reıd júrgizildi, qalanyń 31 000 úıiniń ishinen 4 437-i qamtyldy.
Órt qaýipsizdigi talaptaryn buzýdyń shamamen 8 000 deregi anyqtaldy. Departament esebinde áleýmettik jaǵynan osal toptarǵa jatatyn 1 738 otbasy bar, olardyń 704-i jeke turǵyn úılerde turady. Bul otbasylardyń barlyǵy profılaktıkalyq jumystarmen tolyq qamtyldy, al olardyń tizimderi mekenjaılyq kómek kórsetý úshin ýákiletti organdarǵa joldandy», — delingen vedomstvonyń baspasóz qyzmeti taratqan habarlamada.
Sońǵy tórt jylda áleýmettik osal sanattaǵy azamattardyń úılerine 3 000-nan astam kómirqyshqyl gazy datchıgi ornatyldy. Bıyl aýdan ákimdikterimen birlesip taǵy 233 otbasy datchıktermen qamtyldy. Sonymen qatar, onnan astam úıde peshter men elektr symdary jóndeldi. Bul baǵyttaǵy jumys jalǵasyp keledi.
Búginde qalada barak úlgisindegi 497 jaldamaly úı tirkeýde tur. Polıtsııa jáne ákimdik qyzmetkerleri 175 jospardan tys tekserý júrgizdi, al 2024 jyly 165 márte tekserilgen. Tekserý nátıjesinde órt qaýipsizdigi talaptaryn buzýdyń 1 045 deregi anyqtaldy.
Qutqarýshylar órt pen kómirqyshqyl gazymen ýlaný jaǵdaılaryn boldyrmaý úshin órt qaýipsizdigi erejelerin taǵy da eske salady:
- elektr quraldaryn qosýly kúıde qaraýsyz qaldyrmańyz;
- elektr jelisin shamadan tys júktemeńiz;
- tek jaramdy quraldardy paıdalanyńyz jáne pesh pen tútin murjalaryn únemi tekserińiz;
- jylytý quraldarynyń ústine kıim nemese mata keptirmeńiz;
- sirińke men ottyqty balalardyń qoly jetpeıtin jerde saqtańyz;
- kómirqyshqyl gazy jáne tútin datchıkterin ornatyńyz.
Órt nemese tútin sezilgen jaǵdaıda birden «112» nómirine qońyraý shalý qajet.
Aıta keteıik, Astanada tseh otqa orandy.