Jylý berý maýsymyna daıyndyq: Qazaqstan boıynsha 19 mln tonna kómir tasymaldandy

QR Kólik mınıstrligi baspasóz qyzmetiniń habarlaýynsha, bul ótken jyldyń sáıkes kezeńindegi kórsetkishpen birdeı deńgeıde. Onyń ishinde 17,8 mln tonna elimizdiń jylý elektr ortalyqtaryn (JEO) qamtamasyz etýge, taǵy 1,2 mln tonna kommýnaldyq-turmystyq sektorǵa jóneltildi.

Qazirgi ýaqytta óńirlerde qatty otynnyń qajetti qory qalyptastyryldy. Kommýnaldyq-turmystyq sektorda 300 myń tonnadan astam kómir, al elimizdiń JEO-larynda 4,1 mln tonna kómir jınaqtaldy.

Aldaǵy jylý berý maýsymynda kómirdi turaqty ári ýaqtyly tasymaldaýdy qamtamasyz etý maqsatynda birqatar sharalar kesheni iske asyrylýda. Negizgi nazar jylý energetıkasy obektileri men kommýnaldyq-turmystyq sektordy kómirmen úzdiksiz qamtamasyz etýge, tasymaldaý protsesin turaqty uıymdastyrýǵa, sondaı-aq júkteme joǵary kezeńde temirjol ınfraqurylymy men jyljymaly quramdy tıimdi paıdalanýǵa aýdarylýda.

Jyl saıyn kúzgi-qysqy kezeńge daıyndyq aıasynda kómir tasymaldaý jónindegi Jedel shtab jumys isteıdi. Shtab táýlik boıy kómir razrezderinen kómir tıeýdi baqylaýdy júzege asyryp, bos jyljymaly quramdy berýdi úılestiredi jáne temirjol jelisi boıynsha júk aǵyndaryn jedel josparlaýdy qamtamasyz etedi.

Júk jóneltýshilermen birlesip marshrýttyq jáne toraptyq jóneltilimderdi qalyptastyrý boıynsha jumys jalǵasady. Bul kómirdi jetkizý merzimin qysqartýǵa jáne jyljymaly quramdy paıdalaný tıimdiligin arttyrýǵa múmkindik beredi.

Qajetti tasymaldaý kólemderin qamtamasyz etý úshin «Qaztemirtrans» AQ 29 myń jartylaı vagonǵa ıe. Qolda bar vagon parki jylý elektr ortalyqtaryna, kommýnaldyq-turmystyq sektorǵa jáne ónerkásiptik tutynýshylarǵa qatty otyndy tasymaldaý qajettiligin qamtamasyz etýge múmkindik beredi.

Qazaqstanda kómir baǵasy 2022 jyldan beri qalaı ózgergeni týraly myna materıaldan oqýǵa bolady.