Jylý berilgen turǵyn úıde páter jylymasa, qaıda júginý kerek
ALMATY. KAZINFORM – Qazan aıynyń basynda elimizdiń birqatar óńirinde jylytý maýsymy bastaldy.
Jylý aldymen áleýmettik nysandarǵa — balabaqshalarǵa, mektepterge jáne medıtsınalyq mekemelerge beriledi. Odan keıin turǵyn úı keshenderi qosylady. Degenmen, tutas úıge jylý qosylsa da, keı páterlerde batareıalar istemeı, jylymaı qalatyn kezder bolady. “Almaty jylý júıesi” JShS ókilderi mundaı kezde qaıda júginý qajet ekenin túsindirdi.
Kásiporyn mamandarynyń aıtýynsha, jylytý maýsymy bastalǵan kezde jylý jetkizgishti balanstyq ajyratý shekarasyna deıin, ıaǵnı kóppáterli úıdiń nemese basqa nysannyń torabyna deıin jetkizedi. Ári qaraı ony páterlerge jiberýge basqarýshy uıym - múlik ıeleriniń birlestigi (MIB), páter ıeleriniń kooperatıvi (PIK) ne ózge uıym jaýapty.
- Eger páter ishinde jylý bolmasa, batareıalar nashar jylytsa nemese jartylaı jyly bolsa PIK-ne, MIB-ne nemese servıs kompanııasyna júginý qajet. Basqarýshy uıymnyń mamandary jylytý júıesinen aýany shyǵarýy, jylý pýnktiniń jumysyn retke keltirýi, barlyq úı-jaılardyń birkelki jylytylýyn qamtamasyz etýi tıis. Úıishilik jylytý júıesiniń jumysy kóppáterli turǵyn úıdi basqarý organynyń (PIK/MIB) nemese qyzmet kórsetýshi uıymnyń jaýapkershilik aımaǵyna jatady, - dep túsindirdi “Almaty jylý júıesinen”.
Eske salaıyq, Qazaqstanda jylý berý maýsymy 11 óńirde bastaldy. Qalǵan oblystarda jylytý júıeleri aýa raıyna baılanysty qazan aıy ishinde kezeń-kezeńimen iske qosylady.
Sondaı-aq Almatyda 9 qazannan bastap qalada ortalyq jylý júıesine qosý jumystary bastalady. Al turǵyn úılerdi ortalyq jylýǵa qosýdy 10 qazannan bastaý josparlanǵan.
