Jylý berildi, biraq shaǵym kóp: Bektenov ákimderge tapsyrma berdi
ASTANA. KAZINFORM — Búgin Úkimet otyrysynda Premer-mınıstr Oljas Bektenov jylýǵa qatysty turǵyndardan shaǵym kóp túsken óńirlerdi atady.
— Kúzgi-qysqy jylytý maýsymyna qatysty kúndelikti máselelerdi de erekshe nazarda ustaǵan jón. Qazirgi tańda barlyq óńirde jylý berý maýsymy bastaldy. Jaz aılarynda jabdyqtardy, jylý men elektr jelilerin jóndeý sharalary qabyldandy. Tutynýshylarǵa jylý kestege sáıkes berildi. Biraq jylýdyń sapasyna narazy nemese jylýsyz qalǵan turǵyndar tarapynan shaǵymdar da kelip túsip jatyr. Olardyń ishinde Aqtaý, Pavlodar jáne Petropavl turǵyndary bar, — dedi Oljas Bektenov.
Osyǵan oraı Premer-mınıstr óńir ákimderine jylý berý maýsymyna jaýapty óńirlik shtabtardyń jumysyn kúsheıtip, halyqtyń aryz-shaǵymdaryna jedel áreket etýdi tapsyrdy.
— Qys aılaryndaǵy jumystarǵa avarııalyq brıgadalar men arnaıy tehnıkany tolyq jumyldyrý qajet. Sonymen qatar óńir ákimdikteri halyqqa qajetti kómirdiń turaqty baǵamen qoljetimdi bolýyn baqylaýda ustasyn. Energetıka mınıstrligi men óńir ákimdikteri energııa kózderindegi jóndeý jumystaryn bekitilgen kestege sáıkes aıaqtap, qajetti jabdyqtar rezervin ázirleýge tıis. Jylytý maýsymynda halyqty turaqty ári sapaly jylýmen qamtamasyz etýdi tapsyramyn. Áleýmettik nysandardy erekshe nazarda ustańyzdar, — dedi Úkimet basshysy.
Aıta keteıik, Erlan Aqkenjenov ákimderge óńirlerde kómirge qatysty jasandy dúrbeleń týdyrmaýdy eskertti.
