Jylý aqysyn tólemegen almatylyqtardyń úıinde ystyq sý óshiriledi
ALMATY. KAZINFORM — Jylý men ystyq sýǵa qaryz almatylyqtar qatań jazalanady. Búginde qordalanǵan qaryzdyń jalpy somasy 2,1 mlrd teńge jetken.
Almatynyń kommýnaldyq qyzmeti jylýdyń aqshasyn tólemegen turǵyndardan sot arqyly qaryzyn óndirip, tolyq ótelgenshe páterindegi ystyq sýyn óshirýdi qolǵa aldy.
Endi kún saıyn «Almaty jylý júıesine» qaryz birneshe ondaǵan boryshker ystyq sýdan qaǵylady.
Aıta ketetin nárse, eki jáne odan da kóp aı boıy tólenbese, tutynýshy boryshker sanatyna enip, qaryzdy óteý týraly habarlama alady.
«Boryshkerlerge ystyq sý berýdi toqtatý — amalsyz qoldanylǵan shara. Kásiporyn mundaı sharaǵa barýǵa májbúr, óıtkeni tutynýshylardyń jylýdyń aqysyn tólemeýi aldaǵy jylytý maýsymyna tolyq daıyndalýǵa, qystan qysylmaı shyǵýǵa keri áserin tıgizedi. Bıyl jyl basynan beri Almatyda jylýdyń aqshasyn tólemegen 1610 abonenttiń úıindegi ystyq sýy óshirilgen. Búginge deıin kompanııaǵa jylý men ystyq sý úshin tólemegen 1212 tutynýshynyń aktıvi, 355 banktik esepshot buǵattaldy, tólemdi ýaqytynda tólemegen 165 azamatqa Qazaqstannan shyǵýǵa tyıym salyndy», — dep habarlady «Almaty jylý júıesi» JShS.
Kompanııadan atap ótkendeı, qoldanystaǵy zańnamaǵa sáıkes, kommýnaldyq qyzmet boıynsha qaryzdyń bolýy (boryshkerler týraly aqparat «Memlekettik kredıttik bıýro» AQ suraýy boıynsha beriledi) nesıe berý kezinde de eskeriledi.
Jylý júıesiniń qyzmetkerleri qaryzdy óndirý jumystary turaqty túrde júrgizilip otyratynyn eske saldy.
Sondyqtan «AlJJ» JShS azamattardy qaryzyn tez arada óteýge jáne kommýnaldyq qyzmet úshin tólemdi ýaqytyly tóleýge jaýapkershilikpen qaraýǵa shaqyrdy.
