Jylý aqysy qymbat shyqty: Astana–Teplotranzıt turǵyndar shaǵymyna túsinik berdi
ASTANA. KAZINFORM – Elorda turǵyndary áleýmettik jelide ótken aıdaǵy jylýdyń aqysy ádettegiden joǵary shyqqanyn jarysa jazyp jatyr. Osyǵan baılanysty Kazinform tilshisi «Astana–Teplotranzıt» AQ-dan mán-jaıdy anyqtap kórdi.
Turǵyndardyń shaǵymynda jeltoqsan aıynda qatty aıaz bolmasa da jylý aqysy joǵary kelgeni aıtylǵan.
Endi biri tek ózinde emes, búkil turǵyn úıdegi páterlerge jylý aqysy qymbat shyqqanyn jazǵan.
«Astana–Teplotranzıt» AQ túsindirýinshe, ótken aıda tarıfte ózgeris bolmaǵan.
— Jylý energııasy úshin tólemaqy turǵyn úıdiń ortaq eseptegish qurylǵysynyń kórsetkishterine baılanysty belgilenedi. Syrtqy aýa temperatýrasy jylý energııasynyń shyǵynyna áser etedi. Kún sýytqan saıyn, úıdi jylytýǵa kóbirek energııa jumsalady. Soǵan saı jyldyń sýyq aılarynda tólemaqy da óse túsedi. Ótken aıda jylý tarıfinde ózgeris bolǵan joq, - delingen jaýapta.
Sondaı-aq kompanııa qarasha aıymen salystyrǵanda jeltoqsanda táýliktiń ortasha temperatýrasy tómenirek bolǵanyn atap ótken.
- 2024 jylǵy qarasha aıynda ortasha aýa temperatýrasy -3,45 ℃, jeltoqsan aıynda -8,78 ℃ boldy. Sondaı-aq qarasha aıynda 30, jeltoqsan aıynda 31 jylý esepteý táýligi baryn da eskerý kerek, - delingen málimdemede.
«Astanaenergosbyt» JShS aqparat ortalyǵy jeltoqsan aıyna arnalǵan túbirtekterde qarashaǵa qaraǵanda gıgakalorııa mólsheri joǵary bolǵanyn, biraq tarıfte ózgeris bolmaǵanyn aıtady.
Aıta keteıik, buǵan deıin «Astana—Teplotranzıt» AQ elordada jylý tarıfin kóterýdi usynǵanyn habarlaǵan edik.