Jylqy izdeýge shyǵyp, dalada túnegen eki atyraýlyq aman tabyldy

ATYRAÝ. KAZINFORM – Atyraý oblysynyń Mahambet aýdanynda turatyn er men áıel bir kún buryn mal izdeýge shyǵyp, qaıta oralmaǵan. Qutqarýshylar joǵalǵan eki adamdy búgin tapty. 

Atyraý oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, eki adam 24 naýryzda «Nıva» kóligimen jylqy izdeýge shyqqan. 
Alaıda, keri oralmaı, habar-osharsyz ketken. Bul týraly týystary habar bergen.

«25 naýryzda saǵat 08:20-da Mahambet aýdanyndaǵy №11 órt sóndirý bóliminiń qutqarýshylary 1977 jylǵy azamat pen 1983 jyly týǵan áıeldi izdestirý jumysyn bastady. Qutqarýshylar Mahambet aýylynan 9 shaqyrym qashyqtyqtaǵy «Seıtek» shaıhanasyna qaraı dalalyq aýmaqtan izdestirý-qutqarý jumystaryn júrgizdi. Alaıda, atalǵan mańnan joǵalǵan eki adam tabylǵan joq. Joǵalǵandardy izdestirý odan ári jalǵastyrylyp, Qutqarýshylar qyrǵa qaraı izdestirý-qutqarý jumystary 46 shaqyrym qashyqtaǵy «Áben qystaǵy» ýchaskesine deıin jalǵasty. Dál osy qystaqtyń mańynda batpaqqa batqan «Nıva» kóligi men er men áıel tabyldy. Olardyń jaǵdaıy qalypty, medıtsınalyq kómekti qajet etpedi», - dep habarlady qoǵammen baılanys toby.

Jylqy izdeýge shyǵyp, dalada túnegen eki adamdy izdestirý jumysyna №11 órt sóndirý bóliminen 4 qyzmetkeri, 1 tehnıka tartyldy. Tótenshelikterge Mahambet aýdandyq polıtsııa bóliminiń 5 qyzmetkeri 2 tehnıkamen, aýyl turǵyndarynan 3 adam kómek bergen.

Eske sala ketelik, budan buryn mototsıklden qulaǵan aqtóbelik Atyraý oblysynyń qutqarýshylarynan kómek suraǵanyn jazǵan bolatynbyz.