Jylqy eti men qymyz eksportyn damytý: jylqy sharýashylyǵy zerthanasy qashan ashylady
AQTÓBE. KAZINFORM — Aqtóbe oblysynda ulttyq mal sharýashylyǵyn damytýǵa jáne qazaqtyń jylqy sharýashylyǵy dástúrin saqtaýǵa baǵyttalǵan joba aıasynda «Qazaq jylqy sharýashylyǵy jáne jemshóp óndirý ǵylymı-zertteý ınstıtýty» ǵımaratynyń qurylysy júrgizilip jatyr. AShM málimetinshe, ǵylymı-zertteý ınstıtýtynyń qurylysy 2026 jyly aıaqtalady.
— Qazaq ǵylymı-zertteý jylqy sharýashylyǵy ınstıtýty ótken jyly Memleket basshysynyń tapsyrmasymen ashyldy. Bir jyldan az ýaqyt ishinde burynǵy tájirıbe stansasy ǵylymı-zertteý mekemesine aınaldy. Qazirgi ýaqytta zamanaýı ǵımarattyń qurylysy júrgizilýde, onyń quramynda asyl tuqymdy jylqylardy jan-jaqty zerdeleýge arnalǵan bes zerthana qarastyrylǵan. Instıtýttyń negizgi mindetteri — jylqy eti men qymyz eksportyn damytý, ulttyq sport túrlerin nasıhattaý jáne sporttyq jylqy sharýashylyǵyn órkendetý. Sondaı-aq otandyq shabandozdardyń halyqaralyq jarystarǵa qatysýyna jaǵdaı jasaý josparlanyp otyr, — dedi «Qazaq jylqy sharýashylyǵy jáne jemshóp óndirý ǵylymı-zertteý ınstıtýty» aktsıonerlik qoǵamynyń basqarma tóraǵasy Álibek Bazarǵalıev.
Instıtýt qurylymynda manej, at qoralar, veterınarııalyq pýnkt, zerthanalar jáne ıppodrom qarastyrylǵan. Bul keshen ǵylymı zertteýler júrgizýge, praktıkalyq jumystar atqarýǵa jáne jylqy sharýashylyǵy salasyndaǵy mamandardy daıarlaýǵa múmkindik beredi.
Qurylys 2026 jylǵy mamyr aıynda aıaqtalyp, paıdalanýǵa beriledi dep kútilýde. Jobany iske asyrý salanyń ǵylymı negizin nyǵaıtyp, asyl tuqymdy jumystardyń sapasyn arttyrýǵa jáne Qazaqstannyń jylqy sharýashylyǵyn jańa deńgeıge kóterýge múmkindik beredi.
Aıta keteıik, buǵan deıin Qazaq jylqy sharýashylyǵy ınstıtýtyn salatyn jer áli tabylmaǵanyn jazǵan edik.