Jylytý maýsymyndaǵy qaýipsizdik: neden saqtaný kerek
ASTANA. KAZINFORM — Elde jylytý maýsymy bastala sala jeke turǵyn úı sektoryndaǵy órt qaýpi artady. Tótenshelikter pesh jaqqan kezde qaýipsizdik erejelerin saqtaýǵa shaqyrady. Bul týraly QR TJM Órtke qarsy qyzmet komıtetiniń bas mamany Eldos Zııada aıtty.
— Buǵan tek qana pesh jaǵý sebep bolmaıdy. Qys kelisimen turǵyndar elektr qýatyn da shamadan tys paıdalanady. Biraq, turǵyndar kóp jaǵdaıda qaýipsizdik sharalaryn eskermeıdi. Al salǵyrttyqtyń sońy qaıǵyly oqıǵaǵa alyp keledi, - deıdi Eldos Zııada.
Onyń aıtýynsha, jylytý maýsymy bastalmaı turyp, ázirlikke kirisý kerek. Qubyrlardy tazalap, qandaı da bir aqaý bolsa aldyn ala retteý qajet.
— Elde peshtiń birneshe túri bar. Qatty otynmen ıaǵnı, kómirmen jáne gazben jylytatyn pesh. Olardy qoldaný erejeleri ártúrli. Birinshiden, aqaýy bar peshti qoldanýǵa bolmaıdy. Biraq órt kóp jaǵdaıda elektrli peshterden shyǵady ;áne jylytý qurylǵylaryn shamadan tys paıdalanǵanda bolady, - dedi ol.
Sala mamandary jylytý maýsymyna daıyndyqty jazda bastaıdy. Basymdyq jeke turǵyn úı sektorynda turatyn áleýmettik osal toptyń tizimine kiretin otbasylarǵa beriledi eken. Órt sóndirýshiler arnaıy jadynama taratyp, túsindirme jumystaryn júrgizedi.
— Bizdegi tizimde 109 myńnan astam áleýmettik osal toptaǵy otbasylar men 200 myńnan astam kópbalaly otbasy bar. Biz birinshi kezekte osy otbasylardyń úıin aralaımyz. Tipti, turǵyndardyń suraýy boıynsha pesh qubyrlaryn da tazalap beremiz. Bul jumystar jylytý maýsymy aıaqtalǵanǵa deıin jalǵasady, - deıdi órt sóndirýshi.
Aıta keteıik, mamandar órttiń aldyn alý úshin arnaıy dachtıkter ornatady. Máselen, sońǵy úsh aıda tótenshelikter 9 536 turǵyn úıge arnaıy órtti erte anyqtaıtyn datchıkter ornatylǵan. Degenmen mamandar kez kelgen qurylǵy nemese júıe turǵyndar óz qaýipsizdigine beıjaı qaramaǵanda ǵana nátıjeli bolatynyn eske salady.
Elimizdiń Tótenshe jaǵdaılar mınıstrligi tarapynan aýqymdy aldyn alý jumystary júrgizilip jatyr. Máselen, búginge deıin 112 000-nan asa úıde profılaktıkalyq jumystar júrgizilgen. Nátıjesinde 18 myńnan astam úı órt qaýipsizdigi talaptaryna saı ózgertilgen.
Almaty oblysynyń birneshe aýdany men Qonaevta jylytý maýsymy bastalǵanyn jazǵan edik.