Jylytý maýsymyndaǵy qaýip: turǵyndar neni eskerýi kerek

Bul týraly Tótenshe jaǵdaılar mınıstrligi Órtke qarsy qyzmet komıteti tóraǵasynyń orynbasary Rýslan Qaıraqbaev brıfıngte málim etti.

Órttiń aldyn alý úshin ne istelip jatyr?

15 tamyzdan beri respýblıkalyq órt qaýipsizdigi aktsııasy ótip jatyr. Onyń aıasynda mamandar turǵyn úılerdi aralap, peshter men elektr jabdyqtaryn qaýipsiz paıdalaný joldaryn túsindiredi. Qajet bolǵan jaǵdaıda anyqtalǵan aqaýlardy joıýǵa da kómektesedi.

Rýslan Qaıraqbaevtyń aıtýynsha, ásirese áleýmettik osal toptarǵa jatatyn azamattardyń baspanalaryna erekshe kóńil bólinedi.

— Búginde áleýmettik osal toptarǵa jatatyn azamattar turatyn 96 myńnan astam úı esepte tur. Bul tizim úılerdi aralaý barysynda naqtylanyp otyrady. Ákimdikter men eriktilerdiń kómegimen 74,5 myń úı órt qaýipsizdigi talaptaryna sáıkestendirildi, — dedi ol.

Esepke alynǵan baspanalardyń barlyǵy aldyn alý sharalarymen qamtylǵan. Alaıda jumys munymen aıaqtalmaıdy. Qaýipsizdik talaptary saqtalmaǵan úılerge mamandar qaıta baryp, turǵyndarǵa túsindirý jumystaryn júrgizedi.

2 500 teńgelik qurylǵy adam ómirin saqtaı ala ma?

Turǵyn úılerge gaz ben janý ónimderiniń qaýipti mólsherin anyqtaıtyn arnaıy datchıkter ornatylyp jatyr. Olar aýadaǵy qaýipti gaz mólsheri artqanda dabyl berip, turǵyndarǵa der kezinde áreket etýge múmkindik beredi.

TJM málimetinshe, datchıkter ornatyla bastaǵannan beri olardyń qaýip týraly dabyl bergen 68 jaǵdaıy tirkelgen. Sonyń arqasynda 290 adam ýlaný men ólimnen aman qalǵan.

— Bir datchıktiń baǵasy shamamen 2 500 teńgeden bastalady. Mundaı qurylǵy tutas bir otbasynyń ómirin saqtap qalýy múmkin, — dedi Rýslan Qaıraqbaev.

Ótken jylytý maýsymynda turǵyn úılerge 51 myńnan astam datchık ornatylsa, bıyl 15 tamyzdan beri taǵy 5 myńnan astamy qoıylǵan.

Degenmen qurylǵynyń paıdasy onyń durys jumys isteýine de baılanysty.

— Datchıkti ornatý jetkiliksiz. Onyń jaramdylyǵyn únemi tekserip, batareıasyn ýaqytyly aýystyryp, tazalap otyrý qajet. Áıtpese, qaýip tóngen kezde dabyl bermeýi múmkin, — dep eskertti TJM ókili.

Kimderge tegin kómek kórsetiledi?

Áleýmettik osal toptarǵa jatatyn azamattarǵa datchıkter jergilikti bıýdjet esebinen tegin ornatylady. Eń aldymen, tabıǵı gaz tartylmaǵan, kómirmen jylytylatyn úılerge basymdyq beriledi.

Sonymen qatar jalǵyzbasty qarttar men múmkindigi shekteýli azamattardyń úılerindegi tútin murjalary tazalanyp, jylytý peshteriniń aqaýlaryn jóndeýge kómek kórsetiledi.

— Bizdiń qyzmetkerler esepke alynǵan úılerge baryp, tútin murjalaryn tazalaıdy. Peshterdiń jaryqtary men basqa da aqaýlary bolsa, jóndeýge kómektesedi. Bul jumystar tegin júrgiziledi, — dedi Rýslan Qaıraqbaev.

Bul iske ákimdikter men eriktiler de atsalysady. Negizgi maqsat — ózdiginen jóndeý jumystaryn júrgizýge múmkindigi joq turǵyndardyń baspanasyndaǵy órt qaýpin azaıtý.

«Ata-ananyń úıin tekser» aktsııasy bastaldy

8 qazanda elimizde «Ata-ananyń úıin tekser» respýblıkalyq aktsııasy bastaldy. Ol 10 jeltoqsanǵa deıin jalǵasady.

Aktsııa turǵyndardy qart ata-anasynyń, ásirese aýyldaǵy úıiniń órt qaýipsizdigine nazar aýdarýǵa shaqyrady.

— Ata-anasy aýylda turatyn azamattar olardyń úıindegi elektr symdary men jylytý peshteriniń jaǵdaıyn teksergeni jón. Aqaý bolsa, ýaqytyly jóndetip, qajet bolǵan jaǵdaıda datchık ornatý kerek, — dedi Rýslan Qaıraqbaev.

Onyń aıtýynsha, mundaı saqtyq sharalaryn óz úıinde jáne basqa da jaqyndarynyń baspanasynda júrgizý mańyzdy.

Tótenshe jaǵdaılar mınıstrligi jylytý maýsymynda peshter men elektr symdarynyń jaramdylyǵyn qadaǵalaýǵa keńes beredi. Peshtiń jaryqtaryn ýaqytyly bitep, tútin murjalaryn tazartý qajet.

Aqaýy bar elektr qurylǵylaryn paıdalanýǵa, qosýly turǵan jabdyqtardy qaraýsyz qaldyrýǵa bolmaıdy. 

Rýslan Qaıraqbaev órt qaýipsizdigi talaptaryn buzǵandar ákimshilik jaýapkershilikke tartylýy múmkin ekenin eskertti.

Eske sala keteıik, buǵan deıin turǵyn úılerdegi órttiń shamamen 40 paıyzy elektr jabdyqtaryn ornatý jáne paıdalaný kezinde qaýipsizdik talaptaryn saqtamaýdan shyǵatynyn jazdyq.