Jylytý maýsymyndaǵy qaýip: Qaraǵandy oblysynda 16 myń úı tekserildi

QARAǴANDY. KAZINFORM - Kún sýytyp, jylytý maýsymy bastalǵanda Qaraǵandy oblysyndaǵy jeke turǵyn úılerde pesh jaǵylyp, elektr jylytqyshtary jıi qosylady. Alaıda jylý beretin quraldardyń durys jumys istemeýi órtke ulasyp, kózge kórinbeıtin ıis gazynan ýlaný qaýpin de týdyrýy múmkin.

qaýipsizdigi
Foto: Qaraǵandy oblysy TJD baspasóz qyzmeti

Bitelgen murja, aqaýy bar pesh pen eskirgen elektr symdary adam ómirine qater tóndiredi. Eń qaýiptisi – mundaı qaterdi keıde der kezinde ańǵarý múmkin emes.

qaýipsizdigi, jylytý maýsymy
Foto: Qaraǵandy oblysy TJD baspasóz qyzmeti

Jyl basynan beri oblystyń turǵyn úı sektorynda 50 órt oqıǵasy tirkelgen. Bul ótken jyldyń sáıkes kezeńimen salystyrǵanda 31,5 paıyzǵa az. Byltyr osy ýaqytta 73 órt bolǵan. Degenmen órt sanynyń tómendeýi turmystyq qaýipsizdik máselesi ózektiligin joǵaltty degen sóz emes. Kerisinshe, jylytý maýsymynda peshter men elektr jelilerine túsetin salmaq artyp, órt shyǵý qaýpi de kúsheıedi.

Turǵyndar úshin tónetin basty qaterdiń biri – ýly gazy. Onyń túsi de, ıisi de bolmaǵandyqtan, adam qaýip baryn birden sezbeýi múmkin. Ýlaný belgileri baıqalǵan kezde jaǵdaıdyń kúrdelenip ketýi de yqtımal. Ásirese peshpen jylytylatyn úılerde murjanyń tazalyǵy, peshtiń durys jumys isteýi jáne ýly gazdy anyqtaıtyn arnaıy datchıkterdiń bolýy asa mańyzdy.

qaýipsizdigi
Foto: Qaraǵandy oblysy TJD baspasóz qyzmeti

Tamyz aıynan beri oblysta turǵyn úılerdi aralap, órt qaýipsizdigi talaptarynyń saqtalýyn túsindirý jumystary júrgizilip keledi. Jyl basynan beri mamandar 16 myń úıdi aralaǵan. Olar peshter men murjalardyń jaı-kúıin, jylytý júıeleriniń jaramdylyǵyn tekserip, turǵyndarǵa qaýipsizdik erejelerin túsindiredi. Sonymen qatar órttiń aldyn alýǵa baǵyttalǵan beınerolıkter LED-ekrandar men 40 avtobýsta kórsetilip jatyr.

Ásirese óz úıiniń qaýipsizdigin qamtamasyz etýge múmkindigi shekteýli áleýmettik osal toptaǵy otbasylarǵa basymdyq berilgen. Olardyń úılerine ýly gazdy anyqtaıtyn tórt myńǵa jýyq avtonomdy datchık ornatyldy. Tamyz aıynan beri qosymsha taǵy 1011 qurylǵy qoıylǵan. Budan bólek, 100-den astam murja tazartyldy. Órt qaýipsizdigi aılyǵy kezinde osy sanattaǵy otbasylardyń barlyǵy profılaktıkalyq is-sharalarmen qamtyldy.

Shalǵaıdaǵy aýyldarda qaýipsizdik máselesi odan da kúrdeli. Sebebi órt shyqqan jaǵdaıda eń jaqyn órt sóndirý bólimshesine deıingi qashyqtyq pen qutqarýshylardyń jetý ýaqyty asa mańyzdy. Sondyqtan aýyldyq jerlerde órt sóndirý beketteriniń jumysyn jolǵa qoıýǵa erekshe kóńil bólinip otyr.

qaýipsizdigi
Foto: Qaraǵandy oblysy TJD baspasóz qyzmeti

«Aýyl qutqarýshylary» baǵdarlamasy aıasynda aýyldyq jerlerde 20-dan astam órt sóndirý beketi ashylǵan. Olar jalpy sany 30 myńnan astam adam turatyn 60 eldi mekenge qyzmet kórsetedi. Qazir taǵy 12 bekettiń qurylysy júrip jatyr. Jańa nysandar paıdalanýǵa berilgende órt sóndirý qyzmetiniń qamtý aımaǵyna qosymsha 32 aýyl engizilip, 12 myńnan astam turǵyndy jedel kómekpen qamtýǵa múmkindik týady.

qaýipsizdigi
Foto: Qaraǵandy oblysy TJD baspasóz qyzmeti

Órt oqıǵalarynyń sany azaıǵanymen, jylytý maýsymynda saqtyqty kúsheıtý qajet. Arnaıy datchıkter ornatý men profılaktıkalyq aralaý jumystary qaýiptiń aldyn alýǵa kómekteskenimen, ony tolyǵymen joıa almaıdy. Óıtkeni úıdegi qaýipsizdik, eń aldymen, turǵyndardyń óz jaýapkershiligine baılanysty. Peshtiń jaramdylyǵyn qadaǵalaý, murjany ýaqytyly tazalaý, elektr symdarynyń jaǵdaıyn tekserý jáne jylytý quraldaryn paıdalaný talaptaryn saqtaý – órt pen ıis gazynan ýlanýdyń aldyn alatyn negizgi sharalar.

Buǵan deıin Úkimet otyrysynan keıingi brıfıngte Tótenshe jaǵdaılar mınıstri Murat Muhanov elimizde azamattardyń qaýipsizdigin qamtamasyz etý sharalary jóninde málimdegen bolatyn.