Jylytý maýsymynda monıtorıng júrgizetin júıe iske qosylady – Sátqalıev
ASTANA. KAZINFORM – Qazaqstanda jylytý maýsymyna daıyndyq monıtorıngi júıesi men bilim berý platformasy iske qosylady. Bul týraly Energetıka mınıstri Almasadam Sátqalıev málim etti.

- Byltyr ahýaldyq-taldama ortalyǵy iske qosyldy, ol naqty ýaqytta energetıkalyq obektiler jumysynyń kórsetkishin qadaǵalaýǵa jáne salalyq táýekeldi taldaýǵa múmkindik beredi. Bıyl jylý maýsymynyń daıyndyǵy men ótýine monıtorıng júrgizý júıesi iske qosylady. Sondaı-aq salalyq aqparattyq júıelerge jasandy ıntellekt elementterin engizý jáne munaı ónimderi men suıytylǵan munaı gazyn bólý boıynsha tsıfrlyq servısti iske asyrý josparlanyp otyr, – dedi Almasadam Sátqalıev vedomstvonyń keńeıtilgen alqa otyrysynda.
Mınıstrdiń aıtýynsha, atalǵan jańashyldyqtar salany basqarýdyń tıimdiligin arttyrý men tutynýshylardy energııa resýrstarymen úzdiksiz qamtamasyz etýge yqpal etedi.
Buǵan deıin habarlaǵanymyzdaı byltyr elimiz 87,7 mln tonna munaı óndirdi.