Jylytý maýsymyna daıyndyq: Úkimet óńirlerdegi baqylaýdy kúsheıtti
ASTANA. KAZINFORM — Úkimettik jumys toptary óńirlerdiń jylytý maýsymyna daıyndyǵyn tekserýge kiristi, dep habarlaıdy vedomstvonyń baspasóz qyzmeti.
Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» Joldaýyndaǵy tapsyrmalardy júzege asyrý aıasynda Úkimet óńirlerdiń aldaǵy jylytý maýsymyna daıyndyq jumystaryn keshendi túrde tekserip jatyr. Basty nazar — energetıkalyq ınfraqurylymy ábden tozǵan jáne apat qaýpi joǵary oblystarda.
Premer-mınıstrdiń tapsyrmasy boıynsha úkimettik jumys toptary óńirlerge attandy. 20 tamyzda óńirlik ınspektorlar ári keńesshiler Ermek Marjyqpaev pen Eraly Toǵjanov Abaı jáne Mańǵystaý oblystaryndaǵy daıyndyq barysyn tekserdi. Semeıde Ermek Marjyqpaev qalalyq jylý kózderinde, onyń ishinde «Ǵabbasova», «Ortalyq», AQ-3 qazandyqtarynda, sondaı-aq JEO-1, AQ-1 jáne 103-103A qazandyqtarynda júrgizilip jatqan aǵymdaǵy jumystarmen tanysty. Qazirgi tańda qalanyń jylý kózderi jylytý maýsymyna ortasha eseppen 86% daıyn. Osy rette 12 nysanda jóndeý jumystary áli júrip jatyr.
Jalpy oblys boıynsha 23 energııa kózi men 26 shaqyrym jylý jelilerinde jóndeý jumystary júrgizilýde. Búginde nysandar 82,8%-ǵa daıyn. 2025 jylǵa josparlanǵan is-sharalar nátıjesinde jylý jelileriniń tozýy 59,4%-dan 56,6%-ǵa deıin tómendeıdi.
Mańǵystaý oblysyna jumys saparynda Eraly Toǵjanov «MAEK» energııa keshenin jańǵyrtýǵa qatysty júıeli máselelerge nazar aýdardy. Kásiporynda josparly jóndeý jumystary kestege sáıkes: № 2 JES energııa blogy tolyqtaı jóndelip bitti, JEO-2-de qazan agregaty men týrbınaǵa, sondaı-aq JEO-1-degi qazandyq qondyrǵylaryna jóndeý jumystary jalǵasyp jatyr.
Aıta ketý kerek, buǵan deıin Úkimet rezervinen «MAEK» rekonstrýktsııasyna qarajat bólingen.
Budan bólek, Aqtaýdaǵy jylý jelilerin jańartý jobalary da erekshe nazarda. Qalada kezeń-kezeńimen 44 shaqyrym magıstraldyq jáne 10 shaqyrymnan astam shaǵyn aýdandardaǵy ishki qubyrlar aýystyrylyp jatyr. Qazirgi tańda jelilerdiń ortasha tozý deńgeıi 79%, al jobany iske asyrǵannan keıin bul kórsetkish 75%-ǵa deıin tómendeıdi. Turǵyn úı qory men áleýmettik nysandar jylytý maýsymyna 80% daıyn.
Aıta keteıik, jylytý maýsymyna daıyndyq Úkimettiń erekshe baqylaýynda tur.
Osyǵan deıin Aqtóbe qalasynda keıbir kópqabatty úıler jylytý maýsymyna daıyn emes ekeni anyqtaldy.