Jylytý maýsymyna daıyndyq tsıfrlyq júıege kóshedi
ASTANA. KAZINFORM — Qazaqstanda 2025 jyly kúzgi-qysqy maýsymǵa daıyndyq pen onyń ótýin baqylaýǵa arnalǵan tsıfrlyq júıe synaq rejıminde iske qosyldy. Bul týraly OKQ-da ótken brıfıngte Energetıka vıtse-mınıstri Baqytjan Іlııas málimdedi.
Onyń aıtýynsha, júıe energetıka nysandaryn tolyq qamtyp, olardyń jaı-kúıin bir ortalyqtan baqylaýǵa múmkindik beredi. Sondaı-aq stantsııalar men ózge de óndiris oryndarynyń jumysy onlaın qadaǵalanyp, jóndeý jumystary aldyn ala josparlanady.
Joba aıasynda barlyq nysan, torap jáne jabdyq boıynsha biryńǵaı derekter bazasy qalyptastyrylǵan. Bul málimetterdi júıelep, árbir jabdyqty tehnıkalyq talaptarmen jáne jóndeý merzimderimen baılanystyrýǵa jol ashady. Sonymen qatar júıe elektr energııasyn óndiretin nysandardyń jumys kórsetkishterin naqty ýaqyt rejıminde kórsetedi.
— Kelesi kezeńde aqaýlardy qaǵaz jýrnalǵa tirkeýden tolyq bas tartyp, tsıfrlyq bazaǵa kóshemiz. Rastalǵan derekter men jóndeý merzimderiniń saqtalýyn turaqty baqylaý sapasyn arttyrady, — dedi vıtse-mınıstr.
Mınıstrlik málimetinshe, bul júıe engizilgen jaǵdaıda jylytý maýsymyna daıyndyqty baqylaý merzimi 90 kúnge deıin qysqaryp, apat qaýpi 25%-ǵa deıin tómendeıdi.
Buǵan deıin Premer-mınıstr Oljas Bektenov Astananyń energetıkalyq ınfraqurylymyn tekserip, jylytý maýsymyna daıyndyq pen otynmen qamtý máselesin baqylaýda ustaýdy tapsyrǵan bolatyn.
