Jylytý maýsymyna daıyndyq: SQO-da kómir qory 66 paıyzǵa daıyn

PETROPAVL. KAZINFORM – Soltústik Qazaqstan oblysynda kómirge qatysty dúrmek týyndamaýy úshin turǵyndarǵa kómir qoryn aldyn ala jasaqtaý usynyldy. 

SQO Energetıka jáne turǵyn úı-kommýnaldyq sharýashylyǵy basqarmasynyń basshysy Danııar Qýanyshbaevtyń aıtýynsha, qazirgi ýaqytta barlyǵy 407,5 myń tonna kómir daıyndaldy, bul qajettiliktiń 66%-yn quraıdy.

Óńir jalpy jylytý maýsymynda 620 myń tonna kómir paıdalanady. Sonyń ishinde: turǵyndar – 246 myń tonnatúsirip alǵan. Bul jospardyń – 60%-y. Bıýdjettik mekemelerge 142 myń tonna jetkizildi, olar jylytý maýsymyna ázir. Ortalyq qazandyqtarǵa 19,5 myń tonna ákelingen. 

Eskere ketetin jaıt, bul qazandyqtarǵa arnalǵan kómir jylytý maýsymy barysynda kezeń-kezeńimen jetkiziledi.

– Qazir temirjol tuıyqtarynda 60 myń tonna kómir qory bar. Onyń 2,3 myń tonnasy Petropavlda jatyr. 1600 tonna Shubarkól, 500 tonna Qarajyra, 200 tonna Maıkóbe kómiri bar.Kómir baǵasy markasyna jáne jetkizý pýnktine qaraı ártúrli: Ekibastuz kómiri – 13 500 ben 15 000teńge aralyǵynda, Shubarkól kómirin 19 500 – 25 000 teńgege deıin alýǵa bolady. Qarajyra 18 000 men 24 000 teńge aralyǵynda turady. Maıkóbe kómiri 16 500 teńgeden bastap, 19 000 teńgege deıin satylyp jatyr, - deıdi Danııar Qýanyshbaev.

Basqarma basshysynyń aıtýynsha, osy aıda oblysqa 766 vagon – 52 525 tonna kómir jetkiziledi. Qazir jolda 132 vagon kele jatyr. 

– Kómirdi aldyn ala satyp alyńyzdar, sebebi kúz-qys mezgilinde suranystyń kúrt artýynan defıtsıtke ákelýi múmkin. Jylytý maýsymyna daıyndyq turaqty baqylaýda, - dedi basqarma basshysy. 

Buǵan deıin elimiz kómir óndirýden on iri eldiń qataryna kiretinin jazǵan edik.