Jylytý maýsymyna daıyndyq: Qaraǵandy óńirinde qansha kómir qory bar
QARAǴANDY. KAZINFORM — Óńirde jylytý maýsymyna daıyndyq qyzý júrip jatyr. Jeke sektor turǵyndary úılerin qatty otynmen qamdaýǵa asyǵyp jatyr, al jergilikti bılik kómir tapshylyǵy bolmaıtynyn aıtady.
Qazirdiń ózinde oblysta 580 myń tonna kómir qory jınalǵan. Bul — jalpy qajettiliktiń úshten eki bóligine jýyq. Oblys boıynsha kómir satylymy 55 saýda núktesinde uıymdastyrylǵan.
— Búginde tapshylyq joq, satý jumystary josparly ári turaqty júrip jatyr. Shubarkól kómiriniń ortasha baǵasy tonnasyna 19 100 teńgeni quraıdy, kýznetskilik kómir — shamamen 16 500 teńge, maıkúbindik — 16 000 teńge. Qaraǵandy qalasynda shubarkól kómiri arzanyraq — tonnasy 15 500–15 800 teńge aralyǵynda. Baǵaǵa negizinen logıstıka áser etedi, — dep túsindirdi Kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Aqdıdar Rymbek.
Kásipkerler de jaǵdaıdyń turaqty ekenin rastaıdy.
— Bıyl dúrligý baıqalmaıdy, turǵyndardyń kóbi kómirdi aldyn ala alyp qoıǵan. Bizdiń qoıma jyl boıy jumys isteıdi. Kommýnaldyq-turmystyq maqsattaǵy shubarkól kómirin satamyz. Onyń basty artyqshylyǵy — kúldiń az shyǵýy jáne jylý berý qabiletiniń joǵary bolýy. Qazirgi qor shamamen 5 myń tonna, kún saıyn taǵy 500 tonnaǵa jýyq kómir túsip otyrady. Baǵasy turaqty — tonnasy 15 800 teńge. Temirjol tarıfteriniń ósýine baılanysty quny azdap qymbattady, — dedi «PSV86» JShS dırektory Nıkıta Anosov.
Onyń aıtýynsha, qoıma táýligine 100–150 júk kóligin tıep, jónelte alady.
«Rapıd» kompanııasynda óndiriletin kómirdiń de ózindik ereksheligi bar. Ol jer astynan óndiriletindikten, ózindik quny joǵary, biraq sapasyna saı suranys saqtalyp otyr.
— Bizdiń kompanııa 2001 jyldan beri Qazaqstan Úkimetimen kelisimshart boıynsha jumys isteıdi. Buryn jabylǵan shahtalar ornynda jańa tehnologııalardy paıdalana otyryp kómir óndiremiz. Shyǵyn kóp bolǵandyqtan baǵa joǵary, alaıda sapasy úshin tutynýshylar turaqty túrde alady, — dep túsindirdi «Rapıd» fırmasynyń dırektory Andreı Belov.
Mamandar kómirdi uzaq merzimge saqtaý úshin arnaıy qoıma — kómirqora jabdyqtaýdy usynady. Mundaı oryndar otyndy jel men ylǵaldan qorǵaıdy jáne jyl boıyna onyń sapasyn saqtap turady.
Osyǵan deıin bıyl elordada 17 qoıma (týpık) jumys istep turǵany habarlanǵan edi. Onda halyq úshin kómirdi satý 14 núktede júrgiziletini týraly habarlaǵan bolatynbyz.