Jylytý maýsymyna daıyndyq deńgeıi 57%-ǵa jetti – QazaqGaz
ASTANA. KAZINFORM – Qazaqstannyń gaz tasymaldaý júıesi aldaǵy jylytý maýsymyna daıyndyq jumystarynyń 57%-yn aıaqtady. Bul týraly Úkimet otyrysynda «QazaqGaz» UK AQ basqarma tóraǵasy Álibek Jamaýov málim etti.
Onyń aıtýynsha, búginde QazaqGaz 21,8 myń shaqyrym magıstraldyq gaz qubyryn jáne 76,9 myń shaqyrym gaz taratý jelilerin paıdalanady.
— Gazben senimdi ári úzdiksiz jabdyqtaýdy qamtamasyz etý maqsatynda sáýir aıynan bastap gaz tasymaldaý júıesi nysandaryn jylytý maýsymyna daıyndaý jumystary júrgizilip jatyr. Qazirgi tańda gazben jabdyqtaý obektileriniń jalpy daıyndyq deńgeıi 57%-ǵa jetti. Barlyq jumysty 15 qyrkúıekke deıin aıaqtaýdy josparlap otyrmyz. Sonymen qatar bekitilgen kestege sáıkes jerasty gaz qoımalaryna gaz aıdaý júrgizilip jatyr, — dedi Álibek Jamaýov.
Sondaı-aq ol zańnamaǵa engizilgen ózgeristerge sáıkes, ákimdikter bıýdjet qarajaty esebinen salǵan gaz jelileri endi tikeleı QazaqGaz balansyna beriletinin aıtty.
Kompanııa basshysynyń sózinshe, bul ortalyqtandyrylǵan tehnıkalyq qyzmet kórsetýdi qamtamasyz etip, gaz taratý jelileriniń paıdalaný senimdiligin arttyrýǵa múmkindik beredi.
Aıta keteıik, Qazaqstanda gazdandyrý deńgeıi 64,2%-ǵa jetti.
