Jylytý maýsymyna daıyndyq: Bektenov oblys basshylaryna 5 naqty tapsyrma berdi

ASTANA. KAZINFORM — Premer-mınıstr Oljas Bektenov aldaǵy úsh aıda oblys ákimderi atqarýy tıis birqatar mindetterdi atap ótti.

— Jylytý maýsymyna daıyndyq — ákimdikterdiń aldaǵy úsh aı ishindegi negizgi mindeti. Osyǵan baılanysty mynadaı tapsyrmalar beremin, — dedi Oljas Bektenov.

Úkimet basshysy oblys basshylaryna mynandaı 5 naqty tapsyrma berdi:

1. Óńir ákimdikteri barlyq konkýrstyq rásimderdi eki apta merzimde aıaqtap, jóndeý jumystaryna naqty kirisýi kerek. Basy artyq bıýrokratııaǵa jol berýge bolmaıdy.

Bıyl iske qosý josparlanyp otyrǵan jańa jylý nysandary boıynsha barlyq jumystardy tamyz aıynan keshiktirmeı aıaqtaý qajet.

Ákimderge jylý nysandaryna apta saıyn baryp, jaǵdaıdy jeke baqylaýǵa alýdy jáne barlyq týyndaǵan táýekelder boıynsha shuǵyl áreket etýdi tapsyramyn.

2. Energetıka jáne Ónerkásip mınıstrlikteri, óńir ákimdikteri 10-shy maýsymǵa deıin jylytý maýsymyna daıyndyq josparlaryn naqtylasyn.

Soltústik, ortalyq jáne shyǵys óńirlerde barlyq ınjenerlik ınfraqurylym men turǵyn úı-kommýnaldyq sharýashylyq obektileri 15-shi qyrkúıekke deıin, al qalǵan óńirlerde — 15-shi qazanǵa deıin tolyqtaı ázir bolýǵa tıis.

3. «KEGOC» kompanııasy Energetıka mınıstrligimen birlesip, 15-shi maýsymǵa deıin aldaǵy jylytý maýsymynda ulttyq mańyzy bar stantsııalarǵa arnalǵan jabdyqtardyń jumys rejımderin bekitýi kerek.

Jóndeý merzimderin aýystyrýǵa nemese jumys kólemin azaıtýǵa jol berilmeıdi. Árbir fakt boıynsha menshik ıelerine, sol sııaqty basqarýshy kompanııalarǵa qatysty sharalar qabyldanatyn bolady.

4. Energetıka mınıstrligi Kólik mınıstrligimen jáne ákimdiktermen birlesip, 1-shi qyrkúıekke deıin jylý kózderi men tuıyqtarda otyn qoryn aldyn ala jınaqtaýdy qamtamasyz etsin.

5. Úkimet Apparaty óńirlerdiń jylytý maýsymyna ázirlik barysyna turaqty negizde baqylaý jasap, maǵan tıisti aqparat berip otyrsyn.

Tapsyrmany baqylaý men úılestirý Roman Sklıarǵa júkteldi.

Aıta ketelik Ónerkásip jáne qurylys mınıstrligi aldaǵy jylý maýsymyna daıyndalý maqsatynda is-sharalar josparyn ázirlegen edi.