Jylytý maýsymyna 8,6 mln tonna kómirge qajettilik bar – Úkimet

ASTANA. KAZINFORM – Aldaǵy jylytý maýsymyna óńirlerdi kómirmen qamtý jumystary áli aqsap tur. Bul týraly Ónerkásip jáne qurylys mınıstri Qanat Sharlapaev baıandady. 

«Aldaǵy jylytý maýsymyna kómirge qajettilik 8,6 mln tonnany quraıdy. Onyń ishinde 2,3 mln tonna – kommýnaldyq turmystyq qajettilikke, 6,3 mln tonna halyq paıdalanýyna qajet. Jylytý maýsymyna daıyndyq bastalǵannan beri shamamen 1 mln tonna kómir jetkizildi, bul jyldyq jospardyń 12%-yn quraıdy», - dedi mınıstr Úkimettiń búgingi otyrysynda.

Monıtorıng barysynda 6 óńirde, atap aıtqanda: Abaı, Qyzylorda, Qaraǵandy, Aqmola, Shyǵys Qazaqstan oblystary jáne Astana qalasynda kómir daıyndaý jumystary tómen ekeni anyqtaldy.

«Qazaqstan temir joly jáne kómir óndirýshi kásiporyndar josparǵa sáıkes óńirlerge kómirdiń qajetti kólemin jetkizýge daıyn. Atalǵan óńirler jumysty jandandyrýy qajet», - dedi Q. Sharlapaev.

Óz kezeginde Premer-Mınıstr Oljas Bektenov kómir qoryn erte jınaý týraly buǵan deıin birneshe ret aıtylǵanyn eske salyp, kórsetkishi tómen óńirlerdi synǵa aldy.

Qazir QTJ kompanııasymen, Ónerkásip jáne Kólik mınıstrlikterimen, óńirlermen birlesip, jedel shtab qurylǵan.

«Osy shtab jumysynda qazirgi ýaqytta eń basty maqsat – kómirdi ýaqytyly jetkizý. Óndirýshi kásiporyndar kómir óndirýge daıyn, osy baǵytta 20 myńǵa jýyq tóbesi ashyq vagondardy iske qosamyz. Onyń ishinde 11 myńǵa jýyǵy energetıkalyq kómirge arnalǵan, qalǵan 9 myńǵa jýyq jartylaı vagondy kommýnaldyq turmystyq kómir jetkizý úshin iske qosamyz. Ekinshiden, Shubarkól ken ornynda avtokólikpen alyp ketý pýnktin iske qostyq. Osy jumys barysyndaǵy máseleler jedel shtab pen mınıstrliktiń turaqty baqylaýynda bolady», - dep ýáde berdi Q. Sharlapaev.

Eske sala keteıik, buǵan deıin BQO mektepterinde jylytý maýsymyna daıyndyq qalaı júrgizilip jatqany jóninde habarlaǵan edik.