Jylytý maýsymyn belgilengen merzimde bastaý qajet – Úkimet basshysy
ASTANA. KAZINFORM – Búgin Úkimet otyrysynda Premer-mınıstr Oljas Bektenov ákimderge energııa nysandarynyń qys mezgiline daıyndyǵyn baǵalaý jónindegi komıssııalardyń jumysyna tikeleı qatysýdy tapsyrdy.
- Energııa kózderin jóndeý merzimderin uzartý jaǵdaılary áli de jalǵasyp jatyr. Bul oryndaýshylyq tártiptiń tómendigi men is-sharalardyń ýaqytyly qabyldanbaǵanyn kórsetedi. Energetıka mınıstrligine árbir osyndaı fakt boıynsha ákimshilik sharalar qabyldaýdy tapsyramyn. Jóndeý naýqanynyń merzimin buzǵan nemese ony sozyp júrgen basshylardyń jaýapkershiligin de qaraý qajet. Qazir energııa kásiporyndarynyń jylytý maýsymyna ázirlik pasporttaryn alý jumystary bastaldy. Ákimderge energııa nysandarynyń qys mezgiline daıyndyǵyn baǵalaý jónindegi komıssııalardyń jumysyna tikeleı qatysýdy tapsyramyn, - dedi Premer-mınıstr.
Onyń atap ótýinshe, energııa kózderiniń, jylý jáne elektr jelileriniń jaı-kúıin turaqty negizde tekserip, jóndeý jumystarynyń barysy men qajetti materıaldyq resýrstardyń bolýyn baqylaýda ustaý qajet.
- Ázirlik pasportyn almaı turyp, jylytý maýsymyn bastap ketetin bolsa, tıisti basshylar jaýapkershilikke tartylady. Jalpy Energetıka mınıstrligine óńir ákimdikterimen birlesip, jylý kózderi men jylý jelilerinde jóndeý jumystarynyń ýaqytyly aıaqtalýyn qamtamasyz etýdi tapsyramyn. «Samuryq-Energo» jóndeý jumystarynyń merziminde aıaqtalýyn ǵana emes, jańa qýattardy iske qosýdy da qamtamasyz etsin. KEGOC kompanııasy jeliler men qosalqy stantsııalardy jóndeýdiń bekitilgen kestesin oryndaýǵa tıis. Jylytý maýsymyn belgilengen merzimde bastaý qajet, - dedi Oljas Bektenov.
Aıta keteıik, otyrysta Úkimet basshysy Oljas Bektenov ońtústik óńirlerdiń elektr energııasy senimdiligin kúsheıtýdi tapsyrdy.
