Jylytý maýsymy: Kómir saýdasyndaǵy alypsatarlyq pen ónimsiz deldaldardy joıý jumystary bastaldy
ASTANA. KAZINFORM – Aldaǵy jylytý maýsymy qarsańynda Qarjylyq monıtorıng agenttiginiń alańynda vedomstvoaralyq keńes ótti. Keńesti agenttik tóraǵasy Dmıtrıı Malahov júrgizdi, oǵan Qarjy mınıstri Mádı Takıev pen Básekelestikti qorǵaý jáne damytý agenttiginiń tóraǵasy Marat Omarov qatysty.
Keńes barysynda halyqqa otynnyń maýsymdyq qymbattaýy men tapshylyǵyna jol bermeý úshin ózara is-qımyl máseleleri talqylandy.
QMA ishki naryqqa otyn jetkizetin úsh iri kómir óndirýshi kásiporynǵa taldaý júrgizip, jeke tulǵalar úshin kómirdiń baǵasyn negizsiz qymbattatý jáne ónimsiz deldaldyqqa baılanysty táýekelderdi anyqtady.
Keıbir jaǵdaılarda negizgi baǵadan birneshe esege ósip ketken.
Sonymen qatar, QMA Memlekettik kirister komıtetimen birlesip, salyqtyq mindettemelerdi oryndaý jáne salyq tóleýden jaltarý úshin shyǵyndardy jasandy túrde kóbeıtý boıynsha kómir óndirýshi kásiporyndarǵa tekseris júrgizilip jatyr.
Taǵy bir mańyzdy másele — memlekettik mekemelerdiń kómirdi qymbat baǵamen satyp alýy. Taraptar bıýdjet shyǵyndaryn azaıtý sharalaryn ázirleýge baǵyttalyp otyr.
QMA tóraǵasy Dmıtrıı Malahov jyl saıyn kúzde jylytý maýsymy kezinde halyq pen memlekettik mekemeler úshin otynnyń qymbattaýy jáne tapshylyǵy baıqalatynyn atap ótti. Sonymen qatar, túpkilikti tutynýshy úshin baǵaǵa teris áser etetin "ónimsiz" deldaldarmen «sur» shemalar jalǵasýda.
«Biz bul máselelerdi birlese sheshýimiz kerek. Bizdiń vedomstvoaralyq jumys tobymyz belsendi jumys isteýde, is-sharalardy egjeı-tegjeıli kórsetetin Jol kartasyna qol qoıyldy, onda árbir organnyń róli, maqsattary men mindetteri aıqyndalǵan», - dedi ol.
QR Básekelestikti qorǵaý jáne damytý agenttigi málimeti boıynsha, Qazaqstandaǵy kommýnaldyq-turmystyq kómir naryǵy joǵary shoǵyrlanǵan bolyp tabylady. Monopolııalyq joǵary baǵalardyń belgileri anyqtaldy.
QR Básekelestikti qorǵaý jáne damytý agenttigi jaǵdaıdy turaqtandyrý úshin QMA jáne Qarjy mınıstrligimen birlesip, birqatar júıeli sharalar qabyldaýdy josparlap otyr.
«QR Básekelestikti qorǵaý jáne damytý agenttigi ádil básekelestik jaǵdaılaryn qalyptastyrý jáne tutynýshylarǵa baǵa júktemesin tómendetý baǵytynda jumys isteıtin bolady. Búgin áriptesterimizben birge áleýmettik kómir naryǵynda jumys isteýge arnalǵan vedomstvoaralyq kartaǵa qol qoıyldy. Monopolııaǵa qarsy organ Qarjylyq monıtorıngi agenttigi jáne Qarjy mınıstrligimen birlesip deldaldardy joıýǵa, halyq úshin shyǵyndardy ońtaılandyrýǵa jáne búgin talqylanǵan birqatar júıeli sharalardy júzege asyrýǵa daıyn, bul taýar bırjalaryna baqylaý júrgizý, monopolııaǵa qarsy organnyń quzyreti sheńberinde teń qoljetimdilikti qamtamasyz etý», - dep atap ótti Marat Omarov.
Qarjy mınıstri Mádı Takıev tas kómir naryǵynda kóptegen deldaldardyń bar ekenin atap ótti. Olardy joıý maqsatynda monıtorıng júrgizilip, negizder anyqtalǵan jaǵdaıda keshendi tekserýler bastalady.
«Memlekettik mekemelerge tas kómirdi tikeleı óndirýshilerden satyp alý arqyly bıýdjettik shyǵyndardy qysqartý boıynsha Qarjylyq monıtorıng agenttiginiń bastamasy Qarjy mınıstrligi tarapynan qoldaý tapty», - dedi qarjy mınıstri.
Taraptar kómir salasyndaǵy «alypsatarlyq» shemalardyń aldyn alý jáne «ónimsiz deldaldardy» joıý boıynsha birlesip jumys isteý týraly kelisimge keldi. Kezdesý qorytyndysy boıynsha áleýmettik kómirdiń jasandy qymbattaýy men tapshylyǵyn boldyrmaýǵa baǵyttalǵan naqty is-sharalar men oryndalý merzimderi kórsetilgen Jol kartasyna qol qoıyldy.
