Jylytý maýsymy kezinde Taldyqorǵanda 10 qazandyq jumys isteıdi
TALDYQORǴAN. KAZINFORM — Taldyqorǵan qalasyn jylýmen jáne ystyq sýmen qamtamasyz etý úshin 10 qazandyq jumys isteıdi. Bıyl 5 shaqyrymnan astam qubyr jańartyldy.
Jetisý oblysynyń ortalyǵynda jylytý maýsymy ýaqytyly bastaldy. Jylý jelilerine 766 kópqabatty, 1 290 jeke turǵyn úı, 210 memlekettik mekeme jáne 1 322 kommertsııalyq nysan qosylǵan. Qalany jylýmen jáne ystyq sýmen qamtý úshin 1 iri, 5 kvartaldyq, 4 shaǵyn qýatty qazandyq jumys isteıdi. Basqýat qazandyǵy kómir otynyn paıdalanady.
Qazir tabıǵı gazǵa aýystyra otyryp, «Qaıta qurý, salý jáne keńeıtý» jobasyn ázirleý júrgizilýde. Jobalaý jumystarynyń aıaqtalý merzimi 2024 jyldyń jeltoqsanyna josparlanǵan.
5 kvartaldyq qazandyq tabıǵı gazǵa qosylǵan. Rezervtik otyn — mazýt.
Mamandar bıyl jylytý maýsymy kezinde apattyq jaǵdaı bolmas úshin Gagarın, Aldabergenov, Qablısa jyraý, Jansúgirov, Qabanbaı batyr kóshelerindegi jylý qubyrlary aýystyrylǵanyn aıtady. Onyń jalpy uzyndyǵy 5,4 shaqyrym.
Sonymen qatar Abaı, Daraboz ana, Qabanbaı batyr, Balpyq bı kóshelerine jańa jylý jelileri salynǵan.
Eske salaıyq buǵan deıin Jetisý oblysyndaǵy Qyzyltas saıajaıynyń turǵyndary sýsyz, jaryqsyz otyrǵanyn jazǵanbyz.
