Jylytý maýsymy bastalǵaly Pavlodardyń turǵyn úı sektorynda 8 órt tirkelgen
PAVLODAR. KAZINFORM - Abyroı bolǵanda adamdar aman. Deıturǵanmen oblysqa qarasty aýdandardyń birinde kámeletke tolmaǵan eki bala ýly gazben ýlanyp qalǵan.
Óńirlik Tótenshe jaǵdaılar departamenti bastyǵynyń orynbasary Qaırat Shaımardenovtyń habarlaýynsha, jylý berile bastaǵaly oblys aýmaǵynda birneshe órt oqıǵasy tirkelgen.
- Jylýǵa qosyla bastaǵan sátten turǵyn úı sektorlarynda órtterdiń jıilegeni baıqalady. Maýsym bastalǵaly qutqarýshylar 8 órt oqıǵasyna shyqqan. Abyroı bolǵanda adam shyǵyny joq. Alaıda aýdandardyń birinde eki jasóspirim ýly gazben ýlanyp qaldy, - deıdi ol.
Departament ókiliniń sózinshe, qutqarýshylardyń arnaıy esebinde halyqtyń áleýmettik osal toptaryna jatatyn azamattar turatyn 1 105 turǵyn úı bar. Olardyń barlyǵy ýly gazdy anyqtaıtyn arnaıy datchıktermen (habarlaǵyshtarmen) jabdyqtalǵan.
Qutqarýshylar turǵyndardy órt qaýipsizdigi máselelerine jaýapkershilikpen qaraýǵa jáne órt qaýipsizdigi talaptaryn buzbaýǵa shaqyrady.
- Peshpen jylytý júıesin paıdalaný kezinde janyp jatqan peshti qaraýsyz qaldyrýǵa, sondaı-aq peshti kishkentaı balalarǵa tapsyrýǵa bolmaıdy. Otyndy jáne basqa da tez janǵysh zattar men materıaldardy peshtiń aldyndaǵy tabaqshaǵa qoımańyz. Peshtiń esigin ashyq qaldyrý da asa qaýipti. Al onyń janynda kıim men basqa da zattardy keptirýge, jylytý peshin shamadan tys qyzdyrýǵa bolmaıtynyn da eske salamyz, - dep eskertedi mamandar.
Eske sala keteıik, ShQO-da jer úıden órt shyǵyp, áıel men eki bala mert boldy.
