Jylytý maýsymy bastalǵaly elimizde 913 órt tirkelgen — TJM
ASTANA. KAZINFORM — Búgin Astanada birlesken profılaktıkalyq jumys aıasynda elordalyq jáne aqmolalyq qutqarýshylar elorda men oǵan irgeles ornalasqan oblystyń aýdandarynda birlesken reıd ótkizdi. Bul týraly TJM baspasóz qyzmeti málim etti.
Negizgi maqsat — órtterdiń aldyn alý, jeke sektorda adam ólimin azaıtý jáne tótenshe jaǵdaılardyń aldyn alý úshin múddeli organdarmen ózara is-qımyl tetigin pysyqtaý. Onyń ishinde peshpen jylytylatyn turǵyn úılerge erekshe nazar aýdarylady.
«Elordanyń turǵyn sektorynda jáne oǵan irgeles ornalasqan eldi mekenderde órt jaǵdaıyn turaqtandyrý maqsatynda „Biz qaýipsizdik úshin“ atty jappaı profılaktıkalyq reıdter ótkizilýde. Jeke úıler jylý jáne elektr aspaptaryn paıdalaný erejelerin saqtamaý saldarynan joǵary qaýipti aımaq bolyp qala beredi», — dep TJM Órtke qarsy qyzmet komıteti tóraǵasynyń orynbasary Erlan Tóregeldıev atap ótti.
Jylytý kezeńi bastalǵannan beri elimizde 913 órt tirkeldi, 41 adam qaza taýyp, 28 adam jaraqat aldy. Sondyqtan mundaı profılaktıkalyq sharalardy ótkizý asa qajet.
Qutqarýshylar volonterlermen birlesip úılerge baryp, turǵyndarmen júzdesip, túsindirý jumystaryn júrgizdi.
Turǵyndarǵa:
— jylytý qurylǵylaryn qalaı durys paıdalaný kerek;
— jaramdy elektr symdarynyń mańyzdylyǵy;
— órt sóndirý quraldarynyń bolýynyń qajettiligi;
— órt bolǵan jaǵdaıda qalaı áreket etý kerek degendeı negizgi qaýipsizdik erejeleri túsindirildi.
Qutqarýshylar órt qaýpin azaıtý jáne adamdardyń ómirin saqtap qalý azamattarymyzdyń qaýipsizdik mádenıetin arttyrý arqyly múmkin bolatynyn atap ótti.
Eske sala keteıik, Astanada jeke turǵyn úı órtenip, tórt bala qaza tapqan edi.
Al 18 qarasha kúni Qostanaı oblysynda tórt adam gazdan ýlanyp, kóz jumdy.
